Áleyparin hjá TB/FCS/Royn, Jón Krosslá Poulsen, skal komandi kappingarár spæla við 07 Vestur. Tað boðar 07 Vestur frá á heimasíðu sínari í kvøld.
29 ára gamli áleyparin skeyt í ár átta mál fyri TB/FCS/Royn í Effodeildini, og helst fer hann at mynda álopspartin har vesturi saman við svenska Ken Fagerberg.
07 Vestur er eitt av feløgunum, har ikki nógv hevur verið at frætt um til- og frágongd, men tó varð ein nýggjur høvuðsvenjari settur í síðstu viku, nevniliga fyrrverandi Skála-venjarin, Pauli Poulsen.
Jón Krosslá Poulsen hevur umboðað suðuroyðarliðini VB, VB/Sumba, FC Suðuroy og seinast TB/FCS/Royn. Harumframt hevur hann eisini roynt seg í HB (2011) og Víkingi (2016).
Sambært Faroesoccer hevur hann skotið 48 mál í 203 dystum í Effodeildini.
