Hvar verða jólini hildin í ár?
- Jólini verða hildin í okkara summarhúsum í Lammefjorden.
Tað sigur Sofie Nissen, sum býr í Danmark, men hevur føroyska mammu.
Fer koronu-farsóttin at broyta tykkara jólatraditiónir?
- Eitt sindur, ja. Vanliga plagar mín trúlovaði at koma og vitja seint jólakvøld, men tað verður ikki í ár vegna koronu.
Hvat verður á borðinum jólaaftan og jóladagarnar annars?
- Tað verður dunna og fleskasteik jólaaftan, og á jóladagarnar eta vit restir.
Keypir tú jólagávur og eru allar komnar í hús?
- Ja, eg keypi jólagávur, og hin seinasta skuldi koma við postinum ein av døgunum, sigur Sofie Nissen, sum bæði tosar og skrivar føroyskt, tó at hon hevur búð niðri í fleiri ár.
