Sunnukvøldið bar Vágaportalurin tey tíðindi, at Jákup Mikkelsen – eftir 21 ár á landsliðnum – kendi seg »sparkaðan av landsliðnum«, nú setti landsliðsvenjarin, Heðin Askham, hevur sagt Jákupi, at hann ikki kom at byrja inni í vinardystinum ímóti Íslandi 22. mars.
– Eg vildi geva Jákupi »fair-play«, tí hann er ikki hvør sum helst í føroyskum fótbólti. Hevði eg tikið hann út, so skuldi eg eisini byrjað við honum í málinum, sigur Heðin Askham, sum í dag hevur almannakunngjørt hópin til Íslandsdystin – uttan Jákup Mikkelsen millum teir 18 úttiknu.
– Jákup hevur ikki upp á nakran máta spælt seg av, men eg haldi ikki, at vit kunnu hava ein málmann, sum kanska er í heimsklassa, sitandi á bonkinum, sum hevur verið ein stór orsøk til góðu úrslitini hjá U21-landsliðnum, sigur setti landsliðsvenjarin og sipar til Gunnar Nielsen, sum herfyri skrivaði undir sáttmála við enska Premier League-felagið, Manchester City.
Heðin Askham sigur, at hann ikki vil avskriva nakran í heimligu kappingini, men sambært Vágaportalin følir Jákup Mikkelsen seg avskrivaðan á landsliðnum, nú hann hevur fingið at vita, at hann ikki longur er fyrsta valið til málmansplássið.
– At tað fór at enda soleiðis, hevði eg nú ikki droymt um. Eg hevði hugsað um at spælt mín seinasta dyst á landsliðnum undir øðrum umstøðum, eitt slag av farvæl-dysti, men tað verður so av ongum, sigur hann við Vágaportalin, har hann eisini váttar, at hann ikki vildi fara til Íslands fyri at sita á bonkinum.
