- Hetta var ikki besta umfarið hjá høgru vongunum, men Jóhan Hansen vinnur tilnevningina millum teir 7 bestu, sigur EHF.
Jóhan á Plógv Hansen og liðfelagarnir vunnu ein tryggan sigur, 33 – 24, á Orlen Wisla Plock úr Pólandi seinnapartin í gjár í Champions League bólkaspælinum.
Hetta var ein sera týdningarmikil sigur í bólkaspælinum og Bjerringbro-Silkeborg eru nú trý stig framman fyri Wisla Plock, sum eru mettir at vera millum harðastu kappingarneytarnar í stríðnum at koma víðari úr krútsterka bólkinum.
Jóhan á Plógv Hansen hevði ein góðan dyst á høgra veingi. Seks mál gjørdist tað til at enda, og tað var nokk til, at EHF hevur valt at seta hann á dagsins lið.
Eftir fýra dystir liggur Bjerringbro-Silkeborg á fjórða plássi í bólkinum við fýra stigum. Átta lið eru í bólkinum og fimm tey fremstu koma víðari. Sunnudagin verður enn ein risa avbjóðing fyri Bjerringbro-Silkeborg og Jóhan á Plógv Hansen, tá Paris Saint Germain og Mikkel Hansen skulu basast.
