Íslendska fótbóltslandsliðið er í fríum falli, og enn hevur Åge Hareide til góðar at fáa stig sum landsliðsvenjari hjá Íslandi.
Ísland spældi í kvøld EM-undankappingardyst á útivølli móti Luksemborg í bólki J.
Luksemborg sum hevur havt stóran framburð í landsliðsfótbólti seinnu árini vann dystin 3-1.
Tað gjørdi ikki støðuna hjá Íslandi lættari, at Hörður Björgvin Magnússon fekk seinna gula kortið í 73. minutti.
Íslendsku miðlar eru rættiliga atfinningarsamir móti Åge Hareide, ið annars gjørdi tað gott sum landsliðsvenjari hjá Danmark, árini 2016 til 2020.
Luksemborg 3 - 1 Ísland
1-0 Maxime Chanot ('9 , br.)
2-0 Yvandro Borges Sanches ('70 )
2-1 Hákon Arnar Haraldsson ('88 )
3-1 Danel Sinani ('89 )
Ísland hevur aftaná fimm dystir bert trý stig, ið teir tryggjaðu sær í einum 7-0 sigri á Liktinstein á útivølli. Hetta var áðrenn Åge Hareide var settur í starvið sum landsliðsvenjari.
Portugal er fremst í undanbólki J við fullum stigatali, 15 stig aftaná 1-0 sigur á Slovakia í Bratislava.
Bosnia Hersogovina vann tepran 2-1 sigur á Liktinstein í Sarajevo.
Mánakvøldið klokkan 19.45 tekur Ísland móti Bosnia Hersogovina á Laugardalsvøllinum í Reykjavík. Sama kvøld tekur Slovakia móti Liktinstein, og Portugal tekur móti Luksemborg.
Støðan:
| Nr. | Lið: | Dystir | V | J | T | Málmunur | Stig |
| 1 | Portugal | 5 | 5 | 0 | 0 | 15:0 | 15 |
| 2 | Slovakia | 5 | 3 | 1 | 1 | 5:2 | 10 |
| 3 | Luksemborg | 5 | 3 | 1 | 1 | 7:7 | 10 |
| 4 | Bosnia Hersogovina | 5 | 2 | 0 | 3 | 5:8 | 6 |
| 5 | Ísland | 5 | 1 | 0 | 4 | 9:9 | 3 |
| 6 | Liktinstein | 5 | 0 | 0 | 5 | 1:16 | 0 |
