- Eg veit, at tað eru fólk í Føroyum, sum veruliga eru fátøk, men eg ræðist, at mann byrjar at siga, at mann er fátækur, tí mann ikki hevur ráð til fleiri Ipaddar. Eg ræðist, at Ipaddar skulu definera fátøækradømi.
Soleiðis segði Sissal Kristiansen, tá hon saman við Rana Nolsøe og Maluni Eyðunsdóttir mannaði panelið í seinnapartssendingini á Rás2, har prátað varð um skjótt farnu vikuna.
Eitt av evnunum, sum panelið tosaði um, var fátækramarkið, og nær mann er fátækur.
- Eg haldi, at ofta er tað ein spurningur um raðfesting. Hinvegin, tankin um, at eg veit, at tað eru fólk, sum ikki klára at fáa endarnar at røkka saman, hóast tey liva minimalistiskt, er alt annað enn góður. Tað er ikki okey í dagsins samfelag, og teimum skulu vit lofta, segði Malan Eyðunsdóttir.
- Tað týdningarmiklasta er, at øll fólk í Føroyum hava somu atgongd til teir ymsu møguleikarnar. So kemur tað at vera munur á, hvussu mann forvaltar hesar møguleikarnar. Summi fólk klára seg betur enn onnur, og soleiðis er tað, segði Rani Nolsøe.
Ein fastur partur av Rás2 Seinnaparti fríggjadagar er tátturin Vikan, sum fór. Har sigur eitt panel sína hugsan um nakrar av søgunum og hendingunum, sum hava verið ta vikuna. Panelið er samansett við skiftandi luttakarum hvørja ferð.
Trýst á pílin undir myndini og hoyr alt innslagið um fátækradømi.
Síggj myndatema her
