– Um øll fáa sama prosentvøkstur í lønarhækking, gevur tað eina dupult so stóra lønarhækking til tann, sum forvinnur 40.000 í mun til tann, sum forvinnur 20.000, og tað er ikki rættvíst, ljóðaði grundgevingin hjá fíggjarmálaráðharranum.
Hetta eigur at vera søtur musikkur í oyrunum hjá fakfeløgunum. Serliga hava arbeiðarafeløgini í áratíggju rópt um, at gjógvin millum løntakarar ikki áhaldandi kann breiðka, men fram til nú hevur eingin teirra megnað at vika hvørki arbeiðsgevarar ella Fíggjarmálaráðið í hesum spurningi.
At útrætta hondin í hesum stríðnum skuldi koma frá formanni Fólkafloksins høvdu tey fæstu væl væntað, men kanska er tað bara so, at Jørgen er javnaðarmaður innast inni.
