Tað prutlar undir lokinum í Siumut-flokkinum hjá grønlendska landsstýrisformanninum, Alequ Hammond, tí royndir politikarar í flokkinum finnast at tí, nýggja landsstýrið hevur fingið burturúr higartil.
Hans Enoksen, sum eisini er fyrrverandi floksformaður í Siumut, fer enntá so langt sum at siga, at Aleqa Hammond hevur logið fyri veljarunum, tí hon ikki hevur megnað at livað upp til tey mongu lyfti, hon gav undir valstríðnum.
Eitt nú vísa veljarar á, at vit nú halda fram við fiskivinnupolitikkinum hjá IA, hóast vit lovaðu nakað annað. Og heldur ikki verður nakað gjørt fyri at betra umstøðurnar úti á bygd og fyri at basa arbeiðsloysinum, sigur hann.
Hans Enoksen, sum sjálvur hevur sæti í grønlendska landstinginum, hevur sett Alequ Hammond ikki færri enn seks fyrispurningar, so hon kann fortelja landstinginum, hvussu gongst við at halda givnu vallyftini.
Tað verður eitt stórt vónbrot, um hon ikki megnar at koma við nøkrum ítøkiligum svari, sigur Hans Enoksen.
