- Hetta verður so heilt avgjørt seinastu ferðina.
Ingeborg Vinther, forkvinna í Føroya Arbeiðarafelag, er nú av álvara farin at telja niður til at hon skal fara frá við eftirløn.
Og sostatt fer eitt sermerkt og virkið tíðarskeið í føroyskari fakfelagsrørslu í søguna.
Tá ið felagið hevur aðalfund í næsta mánaði, stendur Ingeborg Vinther fyri vali og hon hevur gjørt av bjóða seg fram einaferð afturat.
- Eg havi umhugsað hetta væl og virðiliga og leingi lá í luftini, at nú var tann rætta stundin komin at lata Føroya Arbeiðarafelag upp í hendurnar á nýggjum kreftum, sigur hon.
Men hon er kortini komin til ta niðurstøðu, er hon fer at bjóða seg fram í eitt valskeið afturat.
- Men hetta verður so heilt avgjørt seinastu ferð, at eg stilli upp til formann í Føroya Arbeiðarafelag.
Hvørt valskeið er tvey ár, so á aðalfundinum í 2011 er púra greitt, at Ingeborg Vinther fer at leggja frá sær.
- Tá verðið eg næstan 66 ár og tá er tíð at gevast, sigur hon.
So tað er í øllum førum greitt, at Føroya Arbeiðarafelag ger klókt í at brúka hesi bæði næstu árini at positionera eitt nýtt fólk at standa á odda fyri felagnum.
Ingeborg Vinther sigur, at Føroya Arbeiðarafelag er akkurát í holt við umfatandi umbyggingar í felagshúsinum í Stoffalág og tí heldur hon, at tað er óheppið, at hon leggur frá sær nú.
Ingeborg Winther bleiv forkvinna í Føroya Arbeiðarafelag á vári í 1980 og hon hevur sostatt staðið á odda fyri landsins størsta arbeiðarafelag í heili 29 ár. Og tá ið hon leggur frá sær um tvey ár, hevur hon verið forkvinna í heili 31 ár.
Men áðrenn hon varð forkvinna, hevði hon verið nevndarlimur í trý ár.
