Í morgin fer helst størsta fótbóltslegendan í heimssøguni, brasilski Pelé (1940-2022) til gravar.
Hann er einasti leikarin, ið hevur vunnið HM-gull tríggjar ferðir, og tað fer ikki at henda aftur í bræði.
Millum tey mongu sum eru komin til Brasil at fylgja Pelé er FIFA-forsetin, Gianni Infantino.
Í samrøðu við brasilska blaðið, Globo sigur Infantino, at øll FIFA-limalond eiga at minnast Pelé við at hava tøgn í ein minutt undan teimum fótbóltsdystum, ið skulu spælast komandi dagarnar.
Í samrøðuni sigur Infantino eisini, at minst ein leikvøllur í hvørjum FIFA-limalandi eigur at vera nevndur eftir Pelé.
Tað merkir so, at vit í Føroyum eiga eisini at nevna ein leikvøll eftir Pelé.
