Í gjár var aftur illveður, eftir at veðrið nú í eina viku hevur verið rættuliga gott. Fleiri skúlar máttu avlýsa skúlagongdina, orsakað av tí nógva vindinum. Eisini avlýstu fleiri av bussunum hjá Bygdaleiðum koyringina. í Gøtu var veðrið so mikið ringt í gjáramorgunin, at ein altanhurð í einum húsum reyk upp og gardinurnar fóru á flog.
Ikki so ógvusligt
Veðurmaðurin hjá Sosialinum, Petur Skeel Jacobsen, heldur ikki, at hettar illveðrið verður eins ringt og tað, ið var um miðjan januar. Tá kom vindstyrkin upp um 50 metar um sekundið í ávísum støðum. Tó væntar Petur Skeel, at vindurin fer at halda á til sunnudagin. Hann sigur, at vit kunnu vænta skrið til storm í dag og í morgin. Síðani væntar hann, at vindurin fer at minka niður í hvassan vind ella skrið til sunnudagin ella mánadagin, tá broyting aftur fer at koma í veðrið.
Vanligt vetrarlágtrýst
Petur Skeel Jacobsen sigur, at orsøkin til illveðrið hesa vikuna er eitt vanligt vetrarlágtrýst. Talan er als ikki um nakað ógvusligt stormlágtrýst, sum tað, ið vit upplivdu um vikuskiftið 15. og 16. januar í ár. Tó sigur hann, at har ið ábært er, kunnu væntast harðar hvirlur, eins og vanligt.
Slutur fyri slatur
Ofta hoyra vit veðurmenn spáa, hvussu summarið fer at verða og so framvegis. Spátt verður um veðrið fleiri mánaðar fram í tíðina. Men hetta heldur veðurmaðurin Petur Skeel Jacobsen lítið um. Hann sigur, at tað beinleiðis er talan um ein slutur fyri slatur, tá spátt verður um veðrið so langt fram í tíðina. Hann sigur, at hetta nevniliga als ikki ber til, og vísir á spádómarnar hjá donskum veðurfrøðingum um, at summarið í fjør skuldi gerast eitt tað lýggjasta nakrantíð. Trupulleikin var bert tann, at júst tað øvugta hendi. Summarið gjørdist eitt tað vánaligasta í langa tíð, og veðurspámennirnir vóru til láturs. Tískil vil Petur Skeel als ikki siga nakað um, hvussu veðrið fer at verða í summar.
