Í blaðnum í gjár kom fólkakirkjan rættiliga á breddan, eftir at fólkafloksungdómar hava verið á stevnu hjá Konservativ Ungdom í Danmark, og har eru komnir upp á aðrar tankar um alment fíggjaðu fólkakirkjuna, sum Jørgen Niclasen, formaður Fólkafloksins tekur til.
Tað er áhugavert, at ungir og spírandi politikarar taka upp til kjak samfelagsviðurskifti, eisini slík eym mál, sum fólkafloksungdómar gera í hesum føri við føroysku fólkakirkjuna. Tað ljóðar eisini so tilforlátiligt og frælst at tosa um talufrælsi, skrivifrælsi og trúarfrælsi - og so postulera, at hin føroyska fólkakirkjan skal missa tær 10 milliónir krónurnar, sum kirkjan fær á fíggjarlógini. Men halló tit konservativu føroysku ungdómar...
Hóast tað kann vera idéalið hjá summum, at statur og kirkja ikki skulu ganga hond í hond, so er tað veruleikin so at siga kring allan heimin. Sjálvt í USA, sum onga statskirkju hevur, hava kirkjur og samkomur meira at siga enn nakrastaðni - og kanska alt ov nógv, nettupp tí, at statur og kirkja/samkomur ikki ganga hond í hond, sum vit kenna tað um okkara leiðir.
Formaður Fólkafloksins mælir ímóti og vísir beinleiðis aftur tí, sum hansara ungu spírar føra fram og vísir á, at fólkakirkjan ger ymiskt arbeiði fyri landið, sum hon ger bíligari, enn landið hevði gjørt tað - og her hugsar hann eyðvitað um primerskrásetingina í kirkjubøkurnar.
Men føroyska fólkakirkjan er so nógv meira enn ein stovnur, sum førir protokoll fyri myndugleikarnar. Fólkakirkjan er grundarlagið undir stórum parti av mentan okkara, sum røkkur so at siga í hvønn krók í landinum. At siga alt fólkið er partur av fólkakirkjuni so ella so. Gamaní hava vit eisini fríkirkjur uttan fyri fólkakirkjuna - so um nakað skuldi verið pilkað við fíggjarliga grundarlagið undir kirkjuni í sambandi við frælsi, so var tað, at fríkirkjurnar vórðu leskaðar fíggjarliga við sama lutfalli sum fólkakirkjan. Tað mátti verið nakað fyri spírandi konservativan ungdóm at tikið upp.
Men at kjakast um religión og samfelag - og hvar skilnaður eitt nú skal ganga ímillum politikk og religión, tað er eitt áhugavert evni at kjakast um. Nógvir fordómar eru at jarða - frá báðum síðum.
Men hetta tiltakið frá Huxa - tað var helst ikki so væl hugsað kortini...
