Ætlanin hevur verið, at nýggja virkið í Fuglafirði skal byggjast millum Havsbrún og Bergfrost, men tað nýggjasta er, at virkið fer at liggja betri millum Bergfrost og Effo Bunkers. Á hesum øki er eisini betri pláss til møguligar seinni útbyggingar.
Fyri fáum døgum síðan kunngjørdi reiðaríið Varðin í Gøtu, sum eigur flestu uppsjóvarskip í Føroyum, at felagið saman við Delta Seafood á Tvøroyri fer at byggja eitt nýtt uppsjóvarvirki á Tvøroyri. Karmurin um nýggja virki er flakavirkið á Tvøroyri, sum Delta Seafood keypti úr búnum eftir Faroe Seafood. Hetta virkið skal útbyggjast í báðum endum, og síðan skal tað tillagast til at arbeiða uppsjóvarfisk. Sum skilst, skal virkið bæði kunna innfrysta heilan fisk og annars virka uppsjóvarfisk til dýrari matvørur. Varðin í Gøtu sigur á síni heimasíðu, at nýggja virki á Tvøroyri ætlandi skal byrja at taka ímóti makreli longu í summar.
Ætlanin ikki slept
Sosialurin hevur spurt Sigurd Simonsen, borgarstjóra í Fuglafjarðar kommunu, um uppsjóvarætlaninar í Fuglafirði nú eru sleptar, tá eitt nýtt virki nú eisini skal byggjast á Tvøroyri.
- Enn er so stutt fráliðið, síðan verkætlanin á Tvøroyri varð kunngjørd. Síðan tá havi eg bara hoyrt spurningar millum fólk, men eingi svar. Vit hava ikki verið í samband við felagið í Gøtu, og vit vita tí í løtuni ikki um felagið í Gøtu, sum hevur víst seg at vera opið fyri kapping, kanska eisini vildi verið við í verkætlanini í Fuglafirði. Vit hava havt Varðan við í viðgerðini av verkætlanina hjá okkum, men felagið í Gøtu hevur ongantíð bundið seg til nakað. Tí kunnu vit heldur ikki siga, at teir eru lopnir frá nøkrum, nú felagið hevur gjørt av at gera íløgur á Tvøroyri.
Sigurd Simonsen sigur, at tey nú fara at viðgera nýggju støðuna, men longu nú er hann sannførdur um, at ætlaninar í Fuglafirði als ikki verða sleptar.
- Fuglafjørður hevur verið miðdepil fyri uppsjóvarfski í 45 ár. Karmarnir hjá okkum eru betri enn aðrastaðni, og vit fara avgjørt framhaldandi at arbeiða fram ímóti, at eitt góðskingarvirki kemur at standa uppi í Fuglafirði áðrenn langt um líður, sigur borgarstjórin.
Ikki hugalig tíðindi
Sigurd Simonsen ásannar, at tað eftir hansara tykki hevði verið betri fyri verkætlanina í Fuglafirði, um ætlanin á Tvøroyri ikki kom undan kavi nú.
- Tíðindini um, at Varðin nú fer undir hesa verkætlan á Tvøroyri, vóru ikki serliga hugalig. Hetta kann gera tað truplari hjá okkum at koma í gongd. Men eftir so mong ár í hesi vinnu og við góðu umstøðunum, sum skaptar eru á havnalagnum og við bryggjukantin í Fuglafirði, eru vit gearaði at fara víðari við okkara ætlanum. Eg ivist heldur onga løtu í, at grundarlag er fyri fleiri enn tveimum virkjum í Føroyum, sum kunnu taka móti uppsjóvarfiski til matna, sigur Sigurd Simonsen, borgarstjóri.
