Sølvi hevur áður hildið fyrilestur fyri føroyskum sjósvimjarum, og hann er skjótur at staðfesta, at hann als ikki vil frámæla fólki henda stuttleika, um tað ger teimum gott.
- Eg havi havt óføra fragd av at síggja øll hesi lopini, sum eru framd seinastu dagarnar, og eg skilji á nógvum fólkum, at tey hava sanna fragd av kensluni, sum kuldaskelkurin gevur, men eg vil eisini mæla fólki til at ansa eftir, sigur Sølvi Winther Olsen.
- Tí tað eru sjúkur, sum kunnu útloysast av skelkinum, sum hetta gevur. Hóast eg ikki havi merkt nakað til hjartatrupulleikar sjálvur, so eri eg komin somikið til ára, at eg eri í einum ávísum vandabólki. Og sjálvur haldi eg, at tað vildi verið spell, um eg soleiðis gav mær sjálvum eina varandi sjúku at dragast við. Og tað eru eisini aðrar sjúkur enn hjartasjúkur, sum kunnu útloysast av hesum, sigur Sølvi.
Ikki kava
Sølvi leggur áherslu á, at tað eru tey fæstu, sum ikki tola hetta, og hann staðfestir, at tað er ein annar vandi, sum er nógv meira ítøkiligur enn sjálvur kuldin.
- Tað er, um fólk kava, og tað vísir seg at vera ov grunt. Tá kunnu vit síggja dømi um fólk, sum gerast lamin, og eg vil staðiliga heita á øll tey, sum í hesum døgum leypa á sjógv, um at gera tað við beinunum fremst.
Ert tú ikki í beinleiðis vandabólkinum fyri sjúkum, so eru tríggir aðrir lutir, sum skulu havast í huga, tá lopið verður útí, sigur Sølvi.
- Ansa eftir, at tú kanst sleppa skjótt upp. Altso at ein stigi ella líknandi er nærhendis. Og latið vera við at svimja langt út.
- Og far ikki einsamallur á sjógv. Fólk mugu altíð vera hjástødd, og hesi mugu eisini vera útgjørd, soleiðis at tey kunnu traðka til, um tað er neyðugt.
- Eg skal avgjørt ikki ræða fólk frá hesum stuttuleikanum. Men tað er umráðandi, at vit og skil verður nýtt, so vanlukkur ikki standast av hesum, sigur Sølvi Winther Olsen.
