Igor Petrikeev spælir helst aftur longu leygardagin, hóast vandi var fyri, at hann hevði blóðpropp. Igor, sum kom til Team Klaksvík undan hesum kappingarárinum, hevði trupulleikar í fyrsta dystinum. Einki blóð kom til høgru hond, og í hálvleikinum var hondin blá. Eftir at hava verið hjá lækna vóru boðini, at Igor møguliga hevur blóðpropp.
- Igor hevur verið til CT skannara í dag og tikið myndir av arminum. Einki var at síggja á yvirarminum, meðan myndirnar av undirarminum og hondini eru óklarar. Tær eru tí sendar til Danmarkar til eftirkanningar, sigur Heri Johnsson, formaður í Team Klaksvík.
Bakkurin, sum kemur úr Moldova, hevur annars fingið tað betri í dag.
- Vit sendu Igor til kraniusacralterapeut í gjár. Tað hjálpi. Hondin hevur nú vanliga farvu og Igor hevur fingið hita í hondina aftur. Igor er takksamur fyri viðgerðina, sigur Heri Johnsson.
Igor kennir nógv trýst á sær, og tí hevur hann verið frustreraður av skaðanum.
- Hann hevur verið ótrúliga keddur,óður og frustreraður av skaðanum, tí hann kennir á sær, at fólk vænta nógv av honum. Í dag er lagið tó gott aftur, sigur formaðurin í Team Klaksvík fegin á málinum.
Tað kom sum ein kvøkkur, tá lækni vildi hava Igor á sjúkrahúsið í skundi, tí hann var bangin fyri, at talan kundi verða um blóðpropp.
- Vit hava ongantíð hildið, at talan var um blóðpropp, men heldur um at okkurt hevur sitið í klemmu og ávirkað blóðrenslið til armin. Helst hevur tað sitið í nakkanum, sigur Heri Johnsson.
Sostatt er líkt til, at Team Kalksvík fær gleði av Igor til dystin leygardagin.
- Hann fær viðgerð hesa vikuna og spælir vónandi leygardagin, sigur Heri Johnsson at enda.
Team Klaksvík spælir leygardagin móti StÍF.
