2. páskadag endaði tað málleyst, tá ið NSÍ vitjaði EB/Streym við Margáir. Soleiðis verður tað ikki í dag. Tað skal finnast ein vinnari, um tað so verður eftir longda leiktíð og brotssparkskapping. Í báðum legum útihýsa tey ikki møguleikanum, at talan verður um longda leiktíð:
-Avrikið 2. páskadag var gott. Vit spældu okkum til fleiri møguleikar, men tíverri vóru vit ikki nóg skarpir, sigur NSÍ venjarin Trygvi Mortensen, sum fegnast um, at hansara menn sýndu gott avrik, eftir at tað tvær ferðir á rað gekk minni væl.
-Bæði í Fuglafirði, har vit taptu 2-1 og í Gundadali, har vit taptu 4-1 ímóti HB, var avrikið í 1. hálvleiki ikki nóg gott. At tað gekk soleiðis í Gundadali taki eg á mínar herðar. Tað vísti seg, at vit høvdu ov stóra virðing fyri HB. Vit vóru ov verjukendir í fyrra hálvleiki. Gongdin eftir steðgin vísti, at tað skuldu vit ikki verið.
EB/Streyma liðformaðurin Gert Hansen veit, at avrikið hjá hansara liði skal verða betri í dag, enn tað var størsta partin av tíðini 2. páskadag, um tað skal eydnast at vinna.
-Tað var bara síðsta korterið, at avrikið var nóg gott. Vit skulu halda fram, har vit sleptu mánadagin. Vit eru í hvussu so er greiðir yvir, hvørji mistøkini vóru, sum vit gjørdu 2. páskadag.
EB/Streymur hevur verið í finaluni sjey ár á rað, og tað eru tíggju ár síðani, at NSÍ var í finaluni, sum HB vann 3-1.
