Jens M. Rasmussen
Í nógv ár hevur verið tosað um ferðavinnu, Smyril kann gerast til eitt av mest vitjaðu støðunum innan ferðavinnuna í Føroyum. Vit skulu jú bara hava nakað, sum hini ikki hava, ella næstan eingin annar.
Hygg á hesa heimasíðuna www.diveexhmashobart.com, hetta er eitt gamalt krígsskip frá fyrst í 1900, sum bleiv sokkið í 2002 til at dykka niður á. Smyril ljóðar ikki serliga spennandi í mun til eitt krígsskip, men tað er ikki her vit skulu hyggja, teir hava eitt krígsskip, vit hava eitt stórt ferðamannaskip.
Vit kunnu lesa um, hvussu hetta bleiv gjørt í Avstralia, og tað er einki til hindurs fyri at hetta kann gerast í Føroyum. Vit hava firðir uttan nógvan streym, har stór skip ongantíð koma, hetta kann vera ein partur av útoyggjamenning, kanska kundi Smyril ligið á botni í onkrum firði í Suðuroynni ella í Norðoyggjunum, bara tað ikki er ov nógvur streymur, tað ger at tað kann blíva vandamikið at dykka, og so skal skipið ikki liggja ov djúpt.
Sjálvandi kostar hetta nakað av peningi, hann skal finnast, tað kann hann eisini um viljin er til staðar.
Uttan at ivast eina løtu, so vilja nógvir dykkarar úr øllum heiminum koma hendan vegin at dykka, tað er bíligt at marknarføra hesar ferðir, tí tað eru jú dykkarafelagsskapir, finn teir og send teimum ein mail við myndum og møguleikum.
Flest allir »sportdykkarar« í Norra, Svøríki, Hetlandi og Danmark vilja fylgja við, hvat hendir um tað gerst veruleiki at eitt ferðamannaskip verður sokkið, og tað verður gjørt trygt at dykka niður á tað.
Hetta er ein stórur møguleiki. Lat hann ikki gleppa av hondum uttan at hava gjøgnumhugsað hann, møguliga íløgan lønar seg.
