Lív Dam
Mensendieck-lærari
Keypir tú vanliga í Miðbýnum?
Ja, av og á. Onkran leygardag kann eg tó eisini fara út á bygd at keypa. T.d. inn á Skálafjørðin, tí eg halidi tað verða so stuttligt at síggja ymsu handlarnar.
Hvat dámar tær Miðbýin, nú hann verður pyntaður til jóla?
Eg haldi tað verða deiliga hugnaligt. Tað er tó eitt, sum er keðiligt, og tað eru allir bilarnir. Talan er um eina gongugøtu. Eitt nú fært tú ikki frið at standa á gøtuni og keypa, um so er at básar við kakao ella onkrum tílíkum eru.
Gera tit nógv burturúr jólunum heima hjá tykkum?
Vit eru somikið fá, so vit halda jólaaftan fyri okkum sjálvi, men sjálvandi hugna vit um og so framvegis
Mikael Mortensen
næmingur
Keypir tú vanliga í Miðbýnum?
Ikki so nógv. Talan er um onkra fløgu av og á, men annars er tað ikki tað stóra
Hvat dámar tær Miðbýin, nú hann verður pyntaður til jóla?
Tað er sera hugnaligt, og gevur ein serligan stemning
Gera tit nógv burturúr jólunum heima hjá tykkum?
Vit gera eitt sindur burturúr. Familjan samlast vanliga til ein góðan døgurða, vit pakka gávur út o.s.fr.
Maja Højsted
Pedagog
Keypir tú vanliga í Miðbýnum?
Eg eri frá Klaksvík, og havi eisini búð niðri í nógv ár, so eg havi ikki verið so nógv her í Havnini, men her eru nógvir handlar og eitt stórt úrval.
Hvat dámar tær Miðbýin, nú hann verður pyntaður til jóla?
Tað er virkiliga hugnaligt. Summi byrja eitt sindur tíðliga, men tað ger einki. Tað er bara gott at gólk koma tíðliga í jólastemning, soleiðis at tey ikki gerast alt ov stressað móti endanum.
Gera tit nógv burturúr jólunum heima hjá tykkum?
Eitt sindur skal gerast, og serliga tá børn eru við. Vit eru tó mest vaksin, men vit pynta og keypa gávur, og royna annars at hugna okkum
Regin Midjord
Kølimaður
Keypir tú vanliga í Miðbýnum?
Sum best liggur fyri. Eg keypi ymiskt, bæði í Miðbýnum og uppi á Hálsi har eg arbeiði.
Hvat dámar tær Miðbýin, nú hann verður pyntaður til jóla?
Tað er øgiliga hugnaligt. Her er heilt sikkurt talan um eina býarmynd.
Gera tit nógv burturúr jólunum heima hjá tykkum?
Eitt sindur, men ikki so øgiliga nógv. Vit pynta og hava jólatræð, og so eta vit sjálvandi eina rúgvu av góðum mati
Schumann Hjaltalin
Stjóri
Keypir tú vanliga í Miðbýnum?
Ja, eg keypi bæði her í Miðbýnum og í SMS.
Hvat dámar tær Miðbýin, nú hann verður pyntaður til jóla?
Mær dámar tað óalmindiliga væl
Gera tit nógv burturúr jólunum heima hjá tykkum?
Vit gera nógv burtur úr og er tað serliga fyri børnunum. Vit hava gávur og træð og vit pynta, klippa, baka og gera annars alt, sum jólunum til
