Í gjárkvøldið vóru fyrru hálvfinalurnar í steypakappingini í fótbólti. B36 og EB/Streymur spældu í Havn, og í Fuglafirði hittust ÍF og Víkingur. Hvørki Útvarpið ella Rás2 søgdu frá dystunum, og nógv hava spurt, hví so er – ikki minst tí útvarpsstøðirnar vanliga gera nógv burtur úr fótbóltinum.
- Vit plaga ikki at útvarpa fyrru hálvfinalurnar í steypakappingini. Tað hava vit ikki gjørt seinnu árini, og tað gjørdu vit heldur ikki hesaferð, sigur Solby Eliasen, programleiðari í Kringvarpinum.
- Hinvegin fara vit at útvarpa seinnu hálvfinalurnar, tá spenningurin er enn størri, og avgerðin fellir, sigur hon.
Stjórin á Rás2 sigur, at rásin kundi hugsa sær at útvarpa hálvfinalurnar, men at tey vilja ikki standa lið um lið við Útvarpið til somu dystir.
- Vit fáa ikki rykt út allastaðni eftir einum degi, tí vit hava ikki linjur allastaðni. Men høvdu vit vitað av í góðari tíð, at Útvarpið ikki fór at siga frá, kundu vit gjørt tað. Tí høvdu vit gjarna vilja fingið eitt samstarv, har Útvarpið segði, hvørjar dystir tey ætla at útvarpa, og hvørjar tey ikki fara at útvarpa, sigur Jonhard Hammer.
Solby Eliasen sigur, at tey fingu ein fyrispurning frá Rás2 um útvarpingina hóskvøldið, og tá svaraðu tey, at tey fóru ikki at varpa út.
- Vit hava áður tosað saman við Rás2 um útvarpingina, og tað skuldi borið til at gjørt tað frameftir eisini, sigur Solby Eliasen.
Jonhard Hammer sigur, at Rás2 fer at fylgja seinnu hálvfinalunum.
- Eg havi í morgun gjørt eina eksklusiva avtalu við Víking og EB/Streym um, at vit útvarpa seinnu hálvfinalurnar hjá teimum ímóti ávíkavist ÍF og B36, sigur Jonhard Hammer.
