Ólavur í Beiti
Anfinn Kallsberg, løgmaður, legði vegna landsstýrið uppskot fyri tingið í farnu viku, har heitt verður á ríkisstjórnina at seta í gildi fyri Føroyar millumlanda sáttmála frá 4. apríl 1997 um vernd av mannarættindum og menniskjans tign í lívfrøði og læknavísindi (sáttmáli um mannarættindi og lívlæknafrøði).
Í viðmerkingunum verður greitt frá, at Evroparáðið hevur í longri tíð viðgjørt trupulleikar hjá mannaættini ísambandi við framstig, ið gjørd eru innan læknavísindi og lívfrøði. Síðan 1978 hevur Ráðharranevndin í Evroparáðnum samtykt fleiri tilmæli viðvíkjandi ymiskum siðfrøðiligum og løgfrøðiligum spurningum, ið hava víst seg í kjalarvørrinum av menningini av lívlæknafrøðiligu vísindini. Við hesum í huga er avrátt at gera ein heildarsáttmála, ið fevnir um meginreglur um at verja menniskju í sambandi við lívlæknafrøðiliga vísind.
? Danskir myndugleikar hava sett seg í samband við myndugleikarnar her á landi við fyrispurningi, um sáttmálin skal setast í gildi í Føroyum, sigur løgmaður Anfinn Kallsberg í viðmerkingunum.
Stóran týdning
? Landsstýrismaðurin í almanna- og heilsumálum metir, at av tí at sáttmálin ásetir reglur um vernd av mannarættindum og menniskjaligari tign í sambandi við menning og nýtslu av lívfrøði og læknavísindi, fer hann at hava stóran týdning fyri eitt felags verndarstøði fyri borgarar í Føroyum og Evropa sum heild.
? Føroysk staðfesting av sáttmálanum hevur við sær, at føroyskir myndugleikar hava ábyrgd av at skipa føroyska lóggávu/siðvenju samsvarandi ásetingum í sáttmálanum, so at sáttmálin verður hildin. Um ivamál verða, skulu føroyskar rættarreglur tulkast á slíkan hátt, at tær samsvara við sáttmálan.
? Fyri at hesin millumlanda sáttmáli kann verða útinntur í Føroyum, er neyðugt at seta »lov om patienters retsstilling« í gildi í Føroyum. Landsstýrismaðurin í almanna- og heilsumálum fer at leggja hetta ríkislógartilmæli fyri Løgtingið í tingsetuni.
? Kortini er ikki neyðugt at hava føroyska lóggávu lidna, áðrenn sáttmálin
verður settur í gildi. Føroysk lóggáva skal bert verða tilevnað rímiliga tíð eftir, at sáttmálin er settur í gildi, sigur løgmaður m.a. í viðmerkingunum til uppskotið.
