Fimm føroyingalið vóru í leiki í bestu donsku hondbóltsdeildini hjá kvinnum í kvøld. Millum dystirnar var eisini ein føroyingauppgerð.
Marita Mortensen og liðfelagarnir í HØJ vunnu á útivølli í BIO CIRC Arena 29-27 á Janu Mittún og hennara liðfeløgum í Viborg. Í steðginum var Viborg á odda 15-14.
Jana skoraði átta mál upp á 11 málroyndir, og hon var toppskjútti hjá Viborg í kvøld. Jana legði eisini upp til fýra mál (assist), og hon vann liðnum tvey brotskøst. Marita var effektiv. Hon fekk tríggjar málmøguleikar, og hon setti allar í netið.
Hondbóltssíðan europamester.dk hevur Janu sum besta leikaran í kvøld. Tey geva Janu toppkarakter, 10 fyri avrikið í kvøld. Marita fær karakterin: 5.
Viborg er nummar fimm í deildini við 29 stigum. HØJ er nummar níggju við 15 stigum.
Maria P. Nólsoy og liðfelagar hennara í Horsens vunnu á heimavølli 34-31 á Keypmannahavn, ið verður liðið hjá Mariu komandi kappingarár. Í steðginum var Horsens á odda 18-17.
Maria skoraði sjey mál upp á 10 málroyndir, og hon var næstbesti málskjúttin hjá Horsens. Maria legði eisini upp til fýra mál.
Horsens er nummar átta í deildini við 18 stigum.
Súna K. Hansen og liðfelagarnir í Skanderborg taptu á útivølli 27-33 fyri Nykøbing Falster, ið var á odda 16-14 í steðginum.
Súna skoraði fýra mál upp á 14 málroyndir. Hinvegin gekk framúr hjá Súnu at leggja upp til mál. Í kvøld hevði Súna heili sjey upplegg til mál. Hon vann eisini liðnum eitt brotskast.
Skanderborg er næstaftast í deildini við 11 stigum. Tær eru lukkutíð fýra stig frammanfyri Bjerringbro, ið liggur á aftasta plássinum, ið merkir beinleiðis niðurflyting til næstbestu deildina aftaná lokið grundspæl.
Landsliðsmálverjin, Rakul Wardum og liðfelagar hennara í Ringkøbing fingu á útivølli eitt heiðurligt úrslit móti verandi meistarunum, Odense. Odense vann dystin 41-38. Í steðginum var Odense eisini frammanfyri við trimum málum, 20-17.
Rakul bjargaði fimm av 25 málroyndum. Kappingarneytin, Alberte Hamborg bjargaði trimum av 19 málroyndum.
Ringkøbing er triðaftast í deildini við 12 stigum.
