FC Honka vann seinna dystin ímóti NSÍ í Conference League hjá UEFA í kvøld. Fyrri dysturin, sum varð spældur í Finnlandi, endaði málleysur, og tí var spenningur um, hvørt NSÍ kundi megna at spæla seg víðari á heimavølli á Svangaskarði.
FC Honka byrjaði dystin betri, og teir løgdu seg eisini fram um eftir góðar sjey minuttir við einum framúr væl spældum mál, har teir sendu aftur um NSÍ verjuna og so upp á tvørs til tann fría Dongou, ið skoraði.
NSÍ fótaði sær sum fyrra hálvleikur leið, og teir fingu betur tak á spælinum. NSÍ bygdi upp og royndi at finna hol í verjuni, men teir spældu seg ikki til nakrar nevniverdar kjansir – einu ferðina skapti tilvildarlig støða vanda, tí Betuel Hansen var íðin og áhaldandi í trýsti í brotsteignum.
Tíðliga í seinna hálvleiki avgjørdi FC Honka dystin við tveimum tøttum málum. Dongou skoraði til 2-0, tá ið hann við einari sera góðari avlevering aftur um NSÍ-verjuna, varð leysur við NSÍ-málverjanum, og síðani økti Lucas Kaufmann til 3-0 við góðum frísparksskoti úr 20 metrum.
Tá var avgerðin so gott sum fallin, hóast ein slakur hálvur tími var eftir at spæla.
##med2##
NSÍ minkaði um munin, tá ið innskifti Jørgen Nielsen skoraði til 3-1, tá ið Klæmint A. Olsen spældi upp á tvørs, eftir at hann fyrst hevði roynt seg við skoti, sum málverjin hálvbjargaði.
20 minuttir vóru eftir at spæla, og NSÍ royndi at minka meira um munin. Tað vóru onkrar støður og okkurt skot, men finska liðið stóð ímóti og vann 3-1.
Munurin millum liðini var ikki tað stórur, men finska liðið var naskari og neyvari í avgerandi støðum.
##med3##
UEFA Europa Conference League
Svangaskarð, 15. juni 2021
NSÍ-FC Honka 1-3 (0-1)
0-1: Jean Marie Dongou, 8.
0-2: Jean Marie Dongou, 60.
0-3: Lucas Kaufmann, 64.
1-3: Jørgen Nielsen, 70.
NSÍ: Karstin Hansen – Jákup Jakobsen (Hans Marius Davidsen, 80.), Oddur Højgaard, Jóhan Troest Davidsen – Pætur Hentze, Betuel Hansen, Tróndur Jensen, Jakob Trenskow – Mikkel Jacobsen (Jørgen Nielsen, 66.), Klæmint A. Olsen
Gult kort: Jóhan Troest Davidsen, Tróndur Jensen, Jákup Jakobsen, Jørgen Nielsen)
Venjari: Allan K. Jepsen
##med4##
##med5##
##med6##
