Hondbóltsútisetar: Sigrar til Tønder og til Leiv sum vann á Róki

Trý føroyingalið vóru í leiki í næstbestu donsku hondbóltsdeildini í kvøld.

Í Odder tóku Leivur Mortensen og liðfelagarnir móti Odense, ið hevði Rók Akralíð á liðnum.

Odder vann ein rættiliga greiðan 35-27 sigur. Í steðginum var Odder á odda 18-14. Leivur og Rókur skutu tvey mál hvør.

Teis Horn Rasmussen skoraði trý mál og Sjúrður Olsen kom ikki á máltalvuna tá lið teirra, Tønder á heimavølli vann málríkan dyst 36-32 á Roskilde. Roskilde var omaná í fyrra hálvleiki, og var á odda 16-14 í steðginum. 

Tað lá munandi betri fyri við málskjótingini í seinna hálvleiki, ið endaði 22-16 til Tønder. 

Sigrarnir góvu Tønder og Odder nakað av luft niður til botnliðini. 

Leygardagin tekur Odder móti Roskilde á heimavølli. Sama dag spælir Odense útidyst móti Team Sydhavsøerne. Sunnudagin tekur Tønder móti oddaliðnum, Midtjyllandi.