Tvey føroyingalið í donskum hondbólti vóru í leiki í kvøld, og bæði taptu.
Í næstbestu deildini taptu Leivur Mortensen og liðfelagarnir ein lykladyst í stríðnum at sleppa undan at spæla Play Off dystir móti einum liði úr triðbestu deildini.
Odder tapti tepurt 29-30 fyri HEI Skæring á útivølli. Í fyrra hálvleiki gekk av skriðuni. Í steðginum var HEI Skæring á odda 17-11.
Leivur Mortensen skoraði tvey mál fyri Odder í kvøld.
Odder hevur 21 stig og er bara eitt stig røttumegin Play Off strikuna. Odder hevur fýra stig niður til beinleiðis niðurflyting.
Leygardagin 9. apríl spælir Odder seinasta dystin í grundspælinum. Odder tekur móti Skovbakken á heimavølli.
Í bestu deildini vóru Hákun West av Teigum og liðfelagarnir í Skanderborg/Århus fyri greiðum tapi móti Skive á útivølli.
Skive sum liggur aftast í deildini vann rættiliga óvæntað 28-21. Í steðginum var Skive á odda 15-10.
Hákun skoraði tvey mál fyri Skanderborg/Århus í kvøld.
Skanderborg/Århus hevur 37 stig á triðja plássi og er trygt víðari til endaspælið.
Komandi týskvøld tekur Skanderborg Århus móti Lemvig á heimavølli í næstseinasta dystinum í endaspælinum.
