Ársins hondbóltsleikari hjá kvinnunum seinasta ár gjørdist kyndlaleikarin Lotte Sørensen, og hóast tað hevur ljóðað, at hon ikki fór at vera í grøna kyndlabúnanum hetta kappingarárið, so hevur hon gjørt av at verða verandi í Føroyum eina tíð afturat.
Lotte hevur, síðani hon kom til Føroya í 1996, rættuliga gjørt vart við seg innan hondbóltin. Tey knøppu 3 árini hon hevur verið her, hevur hon mangan verið ein avgerandi faktorur í teimum dystum, sum kyndlakvinnurnar hava leikt, og eigur hon tískil sín stóra part í teirri framgongd, sum hevur eyðmerkt kyndlaliðið hesi árini. Tað hoyrdist aftaná seinasta kappingarár, at hetta varð seinasta árið hjá Lotte í Føroyum, og sigur hon eisini sjálv, at tað var í hvussu so er upprunaliga ætlanin.
Í Kyndli hava teir tó roynt at gera sítt til, fyri at fáa hana at vera verandi, og hevur hon fingið eina nýggja spennandi funktión í felagnum, har hon skal vera eitt slag av ráðgeva í samband við venjingina av yngru deildum felagsins.
Europa Cup lokkar
Harumframt hava kvinnurnar fingið lovað, at um so er at tær klára seg nóg væl í kappingini, so skulu tær út í Europa at royna seg komandi ár, og sigur Lotte eisini, at hetta sjálvandi hevði nógv at siga, tá hon valdi, at verða verandi í Føroyum.
Vónirnar hjá Lotte fyri kappingarárið eru annars góðar, og sigur hon, at málið sjálvandi er at vinna kappingina. Nú hava tær verið meistarar í 2 ár, so sjálvandi vilja tær varveita heitið. Lotte vísur tó á, at tær hava mist nakað av fólki í ár, og at hetta kann fáa ávirkan á spæl teirra. Nógv gott nýtt fólk er komið, men tað tekur sína tíð, áðrenn vit verða samanspældar.
Aðalmálið er tískil at klára seg somikið væl, at talan gerst um pláss í Europa Cup. Hvussu langt tær so røkka útyvir hetta vil tíðin vísa.
