Tá jarntjaldið fall, hevði hetta eisini sína avgjørdu ávirkan á ítróttarligu úrslitini hjá Sovjetsamveldinum. Russland, sum tjóðin nú aftur æt, minkaði í stórum, so hvørt sum ymsu lýðveldini tóku fullveldi, og eins og í so nógvum øðrum viðurskiftum, so varð Russland brádliga ikki longur at rokna sum nakað veruligt stórveldi.
Ikki minst hevði gamla Sovjetsamveldið havt síni stóru orð at siga í EM-høpi, har teir vunnu gull í fyrstu royndini í 1960. Síðani gjørdist talan í trimum førum um silvurmerki – tað seinasta í 1988. Síðani múrurin fall hevur Russland tríggjar ferðir verið í EM-endaspælinum, men enn er ikki eydnast landinum at vinna seg víðari úr bólkaspælinum.
Kemur altíð víðari
Og fyrst og fremst er tað hendan siðvenjan, sum Guus Hiddink skal broyta. Hollendski strategurin er kendur fyri at vera serstakliga væl fyrireikaður, líkamikið hvør uppgávan er. Og avrikini hava eisini verið framúr. Við Suðurkorea gjørdist hann nummar fýra í HM-endaspælinum í 2002, og fýra ár seinni leiddi hann Australia víðari úr bólkaspælinum, áðrenn liðið í fjórðingsfinaluni tapti móti komandi heimsmeistarunum úr Italia. Enntá eftir eitt sera ivasamt brotsspark.
Tí var úrslitalistin í lagi, tá russiska fótbóltssambandið setti Hiddink í sessin, og við at spæla seg fram um Ongland í undankappingini staðfesti Hiddink eisini sína støðu. Eisini hóast hetta kravdi kroatiska hjálp í seinasta dystinum.
Og so kundi verið lagt afturat, at hollendskir venjarar í løtuni hava serstakliga høgan status í Russlandi. Dick Advocaat, sum fyri stuttum leiddi Zenit Skt. Petersburg til gull í UEFA-Cup kappingini, er nevnliga eisini hollendingur. Og Hiddink hevur alment sagt, at hansara dreymur er, at hann verður boðin á skrivstovuna hjá Putin, tá EM-gullið er komið til høldar.
Vanta royndir
Skal dreymurin renna út, so skal alt tó rigga hjá russunum. Ikki minst eyðkenda og skjóttgangandi álopsspælið, sum ukrainska Dynamo Kiev gjørdi til vørumerki undir Lobanovsky, og sum Petersburg til tíðir sýndi í UEFA-Cup kappingini.
Spurningurin er tó, um liðið í nóg stóran mun megnar at standa móti mentala trýstinum, tá veruligur spenningur kemur í dystirnar. Við tapinum í Ísrael í undankappingini vísti Ísrael, at hetta ikki altíð er so lætt, og hóast góðu fótbóltsevnini, so er talan í stóran mun um ein hampuliga óroyndan hóp, har eingin spælari enn hevur rundað teir 50 landsdystirnar. Og í so máta var tað meira enn bara merkisvert, at Hiddink ikki Aleskandr Kerzhakov úr Sevilla á listanum, tá EM-hópurin varð kunngjørdur.
Hinvegin eru framvegis vandamiklir harrar á liðnum. Og raka Arshavin, Sychev og aðrir dagin, kunnu teir volda meira enn bara lítlar trupulleikar hjá flestu mótstøðuverjunum.
---
Russland
1 Igor Akinfeev
2 Vasili Berezutski
3 Renat Yanbaev
4 Sergei Ignashevich
5 Aleksei Berezutski
6 Roman Adamov
7 Dmitri Torbinskiy
8 Denis Kolodin
9 Ivan Saenko
10 Andrei Arshavin
11 Sergei Semak
12 Vladimir Gabulov
13 Pavel Pogrebnyak
14 Roman Shirokov
15 Diniyar Bilyaletdinov
16 Vyacheslav Malafeev
17 Konstantin Zyrianov
18 Yuri Zhirkov
19 Roman Pavlyuchenko
20 Igor Semshov
21 Dmitri Sychev
22 Aleksandr Anyukov
23 Vladimir Bystrov
Venjari: Guus Hiddink
