Marita Mortensen og liðfelagarnir í HØJ hava vunnið næstbestu donsku hondbóltsdeildina, og hava tryggjað sær uppflyting til bestu deildina, so taka tær ikki av ferðini.
Í dag vann HØJ fimta dystin á rað. Hesaferð gjørdist talan um 33-31 sigur á Rødovre á útivølli. HØJ var frammanfyri 16-12 í steðginum, og tá 11 minuttir vóru eftir av dystinum var HØJ frammanfyri 27-19. Heimaliðið slapp at pynta um úrslitið seinastu løtuna.
Marita skoraði tvey mál í dagsins dysti.
HØJ er langt fremst í deildini við 35 stigum. Tær kunnu røkka 41 stigum. Nummar tvey í deildini, Holstebro hevur 26 stig, og tær kunnu í mesta lagi røkka 32 stigum.
Vár og Lív Zachariassen og liðfelagarnir í Ajax eru triðfremst í deildini við 22 stigum. Ajax spælir dyst á útivølli móti DHG í morgin klokkan 13.
Liðini sum enda á øðrum og triðja plássinum spæla dystir um uppflyting.
