Hilmar Jan Hansen og løgmaður í práti

Jógvan við Keldu, løgtingsmaður

Lurtaði eftir prátinum fjøl­miðlamaðurin Hilmar Jan Hansen og Føroya løg­maður høvdu í Útvarpi Før­oya seinastu viku um út­lendingamálið.
Sigast kann, at løgmaður, hóast hann ofta skinklar, tá ið útlendingamálið um­ræður, at hann stóð seg væl.
Hinvegin hevði Hilmar Jan Hansen ilt við at halda málinum á tí støði, tað eig­ur, men gjørdi fleiri roynd­ir, eins og hann fyrr hevur gjørt, tendensiøst at einfaldgera tann veruleika, sum lógin í sínum bókstavi ásetur.

Blíðskapur er nátúrligur
Eg fari í hesum viðfangi bert at taka tvinnar tættir burtur úr prátinum.
Fyrri tátturin er, har hann leggur fyri løgmann, um vit ikki skulu vera blíð við útlendingar!
Hvat er hetta fyri ein spurningur frá einum fjøl­miðlamanni. Er tað ikki nátúrligt at vera blíður bæði við útlendingar og egnu landsmenn okkara.
Út frá tí, hesin fjølmiðla­maður fyrr hevur hildið fram óseriøst, fari eg at gera vart við, at spurningurin í hesum føri er óvikomandi, um vit eru blíð ella ikki. Her er ein lóg, tað snýr seg um, ein lóg sum skal haldast.
Spurningurin er settur við einum endamáli, fyri at skapa ávísa øsing og er í hesum føri subjektivur og ein roynd at framprovokera kenslur. Ein bíligur Ude og Hjemme stílur.

Hvørki lurtar ella hyggur
Seinni tátturin er, har Hilm­ar Jan Hansen, spyr løgmann, um ikki átti at verið kunnað meir!
Hilmar Jan Hansen er stuttligur maður, og óivað ikki keðiligur at vera saman við, men serliga nærlagdur í álvarsomum máli, er synd at siga hann vera.
Eg trúgvi ikki, soleiðis sum hann viðger málið, at hann nakrantíð hevur ver­ið inni á heimasíðuni hjá Innlendismálaráðnum www.imr.fo, har við­kom­andi kunning er. Heldur ikki hevur hann nakrantíð sett seg í samband við Inn­lendismálaráðið, fyri at fáa eina breiðari kunning, so hann er førur fyri at viðgera málið meiri professionelt.

Krøv til public service stovn
Sjálvandi verður ikki kravt av fjølmiðlafólkum sum heild, at tey skulu seta seg inn í útlendingamálið, sum er fløkt. Hinvegin er av einum public service stovni sum Útvarp Føroya er, sum vit øll eru kravd at gjalda til, minsta kravið at tann sum dittar sær í fjølmiðlum at viðgera málið, skal seta seg rættuliga væl inn í mál­ið, og serstakliga tí tað er so viðkvamt.
Tað hevur Hilmar Jan Hansen ikki gjørt, tað hev­ur hann prógvað.
Her skal meiri til enn bara at vera undirhaldandi, stuttligur og grunnur sum fjølmiðlamaður.
Útlendingamálið er lóg­arfest. At so lóg­in er donsk, og Sam­bands­flokk­urin ikki vil yvirtaka málið, frítekur ikki Hilmar Jan Hansen, fjølmiðlamann at viðgera hetta seriøst í Útvarpi Før­oya.