Zlatan Ibrahimovic hevur einans eitt ár eftir av sáttmálanum við Paris Saint-Germain, og mangar hava søgurnar verið um, at hann fer at skifta felag. Nógv bendir á, at hetta verður seinasta kappingarár hansara í evropeiskum fótbólti.
Sambært svenska Sportbladet, so hevur Zlatan sjálvur luftað tankar fyri nærumhvørvinum um, at hann væl kundi hugsað sær at hildið fram í USA. Tað er júst tað, at flest allar leysasøgurnar hava gingið um, og nú er eisini navn sett á felagið.
Sambært blaðnum, so verður talan um nýggja fótbóltsfelagið í Miami, sum fyrrverandi viðleikari hansara, David Beckham, er í holt við at byrja. Eftir ætlan skal felagið verða klárt at luttaka í kappingum í 2017.
Tað tykist ikki vera ósannlíkt, tí tann nú 34 ára gamli Zlatan Ibrahimovic hevur góð sambond til Florida, har hann eisini hevur gjørt fleiri íløgur.
