Håkan Ericson hevur sett navn á teir fyrstu ellivu, ið byrja á vøllinum móti Póllandi á PGE Narodowy stadion í Warszawa, skrivar Fótbóltssambandið. Væntandi verður nærum fullsett á risastóra leikvøllinum, PGE Narodowy stadion í Warszawa, tá Pólland og Føroyar fara á vøllin klokkan 19:45.
Pláss er fyri umleið 57.000 áskoðarum, og sambært fyriskiparunum, hevur atgongumerkjasølan gingið sera væl síðstu dagarnar.
Føroyska liðið kom til pólska høvuðsstaðin í gjár, og nú ein stórur tími er til avspark, er greitt, hvørjir teir fyrstu ellivu verða, ið Håkan Ericson sendir á vøllin fyri byrjan.
Mattias Lamhauge verður í mál, og verjuna manna Gilli Sørensen, Hørður Askham, Odmar Færø, Sonni Ragnar Nattestad og Viljormur Davidsen, ið eisini er liðskipari. Á miðvøllinum vera Sølvi Vatnhamar, René Shaki Joensen, Gunnar Vatnhamar og Jóannes Bjartalíð, meðan Jóan Símun Edmundsson verður fremstur.
Á bonkinum frá byrjan vera Bárður á Reynatrøð, Teitur Gestsson, Ári Mohr Jónsson, Andrias Edmundsson, Jóannes Kalsø Danielsen, Jákup Biskopstø Andreasen, Andrass Johansen, Hannes Agnarsson, Pætur Petersen, Stefan Radosavljevic, Klæmint Andrasson Olsen og Brandur Hendriksson Olsen.
