Tað gjørdi mun í royndini at basa herviliga skógareldinum á Tenerifa, at tað gjørdist nakað kaldari á oynni síðstu nátt.
Sum skilst, hevur eldurin serliga herjað í óbygdum øki á oynni higartil, og nú eru tilsamans 12.000 fólk nærindis flutt burtur.
Guvernørurin á Kanarisku Oyggjunum, Fernando Clavijo, sigur, at sløkkiliðsfólk høvdu ávísa framgongd síðstu nátt, nú líkindini gjørdust betur.
- Eldurin helt fram at spjaða seg í óbygdum øki har norðuri á oynni, meðan frontlinjan har suðuri á oynni var støðug.
Guvernørurin sigur, at sløkkiliðsfólkini hava gjørt eitt stórt arbeiði, og síðstu nátt endaði einki heim í eldhavinum á oynni.
Skógareldurin á Tenerifa er hin herviligasti í 40 ár, og higartil hevur eldurin rakt eitt øki, sum eru á umleið 84 ferkilometrar.
Fleiri enn 400 sløkkiliðsfólk eru við í arbeiðnum at basa eldinum, og 23 tyrlur og flogfør sleppa vatn niður yvir eldhavið.
Tað er tiðindastovan NTB, sum ber hesi tíðindi í dag.
##med2##
