Tað er ikki altíð, at almennar ognir fáa frið. Vit munnu flestu minnast, tá Sea Shepherd fyri nøkrum árum síðani vóru løgd undir at stjala vesipappír úr almennu vesunum á Sandi.
Hesaferð er tað ikki Sea Shepherd, sum hevur verið upp á spæl, men allarhelst onkrir heldur illavorðnir unglingar. Hvussu er og ikki, so hevur Sørvágs kommuna fyribils stongt almennu vesini á Stakka.
Myndir vísa, at onkur hevur stuttleika sær við at skjóta heksaýl inni á vesunum, hevur brotið botnin á kummuni og annars óruddað illa.
- Tað er sera harmiligt, at tað, ið verður gjørt bygdafólki og vitjandi at frama, ikki fær frið. Vit fara so inniliga at heita á okkara borgarar um at fara væl við sínum egnu ognum, skrivar Sørvágs kommuna.
