FSF hevur í dag sett 59 ára gamla svenskaran Håkan Ericson í starv sum venjara hjá føroyska manslandsliðnum í fótbólti.
Håkan Ericson hevur drúgvar royndir sum venjari. Hann hevur síðan áttatiárini vant svensk feløg, og hann hevur verið venjari fyri svenska U21 landsliðið. Í 2015 vann svenska U21 landsliðið europameistaraheitið.
Sáttmálin millum FSF og Håkan Ericson er galdandi í fýra ár.
Håkan Ericson fer at pendla millum Svøríki og Føroyar, og hann fer at standa á odda fyri fyrstu landsliðssamlingini í mars mánaði.
Á tíðindafundinum segði Håkan Ericson, at hann nú fer at seta seg meira inn í føroyskan fótbólt, og hann segði, at hann hevði brúk fyri hjálp frá føroyskum fótbóltsfólki til at gera hetta og til at røkja starvið komandi árini.
