Hondbóltur
Jákup Mørk
Tað, sum higartil er farið av kappingarárinum, hevur Neistin víst seg sum ein av álvarsligastu biðlunum í oddastríðnum í bestu mansdeildini. Sum støðan er á talvuni í løtuni, so tykjast teir saman við grannunum úr Kyndli og meistarunum úr StÍF sum besta boðið upp á ein føroyameistara, tó at VÍF á ongan hátt skal undirmetast.
Heim í hálvt ár
At kalla hvørja ferð, tá oddaliðini í deildini hava hitst, hevur talan verið um sera tættar dystir, har teir so væl kendu smáu marginalarnir hava gjørt útslagið. Dystir sum kanska hava verið avgjørdir av eini einstakari góðari løtu hjá einum einstøkum leikara, og nú hevur Neistin so syrgt fyri, at teir til endaspælið hava ein leikari fleiri av teimum, sum ofta kunnu gera munin.
Heini Hanusarson, sum hetta kappingarárið hevur roynt seg hjá Team Midtsjælland, verður nevnliga aftur í Føroyum frá nýggárinum og fram til summarfrítíðina.
Hetta letur seg gera, tí lesnaðurin á skúla hansara í Danmark er soleiðis háttaður, og sjálvur sigur Heini, at hann so verður her fram til komandi summar.
- Teir í Neistanum vóru skjótir at liggja framvið, og tá eg jú havi spælt har nógv, áðrenn eg fór niður, var tað ikki so trupult at taka avgerð um, hvar eg skuldi spæla. Seinasti dysturin hjá mær í Danmark á hesum sinni verður so 30. desember, so eg verið tøkur til dyst hjá Neistanum seinast í januar mánaði, sigur hann.
Betri fyri
Og tað er lítið at ivast í, at tað er ein leikari í góðari venjing, sum tá kemur heim. Sjálvur heldur Heini eisini, at hann í dag er betri fyri, enn tá hann fór av landinum.
- Tað vildi eg í øllum førum mett. Hetta seinasta hálva árið havi eg í øllum førum vant væl meira, enn eg havi gjørt í Føroyum, og umstøðurnar at venja eru jú eisini munandi betri, so tað kemur meira burtur úr hvørjum venjingartíma.
- Og so er tað jú eisini so, at hondbólturin her er á einum hægri støði. Tú verður veruliga noyddur at vísa nakað undir venjing hvørja einstaka ferð, um tú skalt halda fast um plássið á liðnum, og til dystirnar er mótstøðan sjálvsagt eisini munandi harðari, so alt í alt meti eg sjálvur, at eg eri heilt væl fyri.
Hvørt hetta so verður nóg mikið hjá Neistanum til at førka seg seinasta pettið upp eftir stigatalvuni, er so ein annar spurningur, men fortreytirnar fyri hesum tykjast í øllum førum vera betraðar við tilgongdini.
