Klaksvíkar Kommuna, almannamálaráðið og samkoman Soli Deo Gloria samstarva við endamáli at møta tørvinum á bústøðum fyri heimleys fólk við sosialum trupulleikum á staðnum.
Tí er ætlanin at byggja samkomubygningin Soli Deo Gloria um til umsorganarheim til tey heimleysu í norðuroyggjum, sum onga staðir hava at fara.
Jógvan Skorheim, borgarstjóri í Klaksvíkar kommunu, segði við Dag og Viku fyrradagin, at ynski er at veita eitt nøktandi tilboð, soleiðis at fólk, sum hava hendan tørvin fáa annað tilboð enn at koma á røktarheim. Nú fáa fólk í slíkari støðu bert tilboð um at koma á røktarheim, og tað tilboðið er ikki nøktandi.
Pláss skal vera fyri átta búfólkum, sum fáa tryggar karmar, song og mat hvønn dag, soleiðis at tey fáa ein regluligan gerandisdag, greiðir Jógvan Skorheim frá.
Samkoman fær á leið 4,6 milliónir í stuðli um árið at reka umsorganarheimið, ætlanin er at Klaksvíkar Kommuna letur 1,8 milliónir, almannamálaráðið letur tvær milliónir og búfólkið eina hálva millión um árið. Hetta skal fíggja raksturin og umbyggingina, verður greitt frá í Degi og Viku hósdagin.
