Heimir hevur kosið sínar menn

Fjórða juni er síðsta freist at boða FIFA frá, hvørjir spælarar skulu luttaka í HM endaspælinum, sum um ein mánað verður í Russlandi.

Fyrsti landsliðsvenjarin av øllum teimum 32, sum í hesum døgum fyrireika seg at taka lut í HM endaspælinum, at almannakunngera spælararnar er íslendski landsliðsvenjarin Heimir Hallgrímsson. Í dag boðaði hann á tíðindafundi frá, hvørjir skulu umboða Ísland í fyrsta HM endaspælinum yvirhøvur, sum grannar okkara fyri vestan skulu luttaka í.

Bara ein av teimum 23 umboðar íslendskt felag. Tað er 33 ára gamli verjuspælarin Birkir Már Sævarsson, sum spælir við Vali í Reykjavík. Valur er barndómsfelagið hjá honum. Hann hevur spælt við Brann í Bergen og Hammarby í Svøríki, og nú er hann aftur í Reykjavík.

Allir hinir 22 eru á lønarlistanum í útlendskum feløgum. Tríggir málverjar hava fingið boð. Teir spæla allir í Danmark, og teir eru einastu spælararnir, sum umboða donsk feløg.

Tveir spælarar eru á lønarlistanum í feløgum, sum spæla í bestu eingilsku deildini. Teir eru Jóhann Berg Guðmundsson úr Burnley og Gylfi þór Sigurðsson úr Everton.

Millum teir spælararnar, sum eru í 35 manna bruttohópinum, og sum ikki hava fingið boð, eru Hjörtur Hermansson, sum er vongverji í Brøndby.

Kolbeinn Sigþórsson er best kendi íslendski álopsspælarin. Hann umboðar Nanter í Fraklandi. At hann ikki er á listanum kemst av, at hann orsaka av knæskaða ikki hevur spælt fótbólt í hálvtannað ár. Tað er dyggur smeitur fyri Íslandi, at hann ikki er tøkur.

Fram til fyrsta dystin hjá Íslandi í endaspælinum ber til at gera broytingar í hópinum, um onkur av teimum 23 verður skaddur. Fyrsti dysturin hjá Íslandi í HM endaspælinum verður16. juni í Moskva ímóti Argentina.

Ísland fyrireikar seg til endaspælið í venjingardysti ímóti Noregi 2. juni og ímóti Ghana 7. juni.

Í endaspælinum er Ísland í bólki saman við Argentina, Kroatia og Nigeria.

Hesir eru boðsendir at umboða Ísland í HM endaspælinum:

Málverjar
Hann­es Þór Hall­dórs­son, Rand­ers
Rún­ar Alex Rún­ars­son, Nord­sjæl­land 
Frederik Schram, Rosk­ilde

Verja
Birk­ir Már Sæv­ars­son, Val
Ragn­ar Sig­urðsson, Rostov
Kári Árna­son, Aber­deen
Ari Freyr Skúla­son, Lok­eren
Sverr­ir Ingi Inga­son, Rostov
Hörður Björg­vin Magnús­son, Bristol City
Hólm­ar Örn Eyj­ólfs­son, Levski Sofia
Samú­el Kári Friðjóns­son, Vål­erenga

Miðvøllur
Aron Ein­ar Gunn­ars­son, Car­diff
Birk­ir Bjarna­son, Ast­on Villa
Jó­hann Berg Guðmunds­son, Burnley
Emil Hall­freðsson, Udinese
Gylfi Þór Sig­urðsson, Evert­on
Ólaf­ur Ingi Skúla­son, Kara­bük­spor
Arn­ór Ingvi Trausta­son, Mal­mö
Rúrik Gísla­son, Sand­hausen

Álop
Al­freð Finn­boga­son, Augs­burg
Jón Daði Böðvars­son, Rea­ding
Björn Berg­mann Sig­urðar­son, Rostov
Al­bert Guðmunds­son, PSV