Heilsuverkið skuldi verið Føroya besta arbeiðspláss

Human Resource Menning er eitt nýtt hugtak í føroysku vinnuni og er næstan ókent í almennu fyri­sit­ingini. Ein av føroysku slóð­brót­aru­num á hesum øki er Eik Banki, sum í Februar 2006 setti á stovn eina HR deild, sum í dag hevur tvey fólk. Einasta almenna arbeiðs­pláss, ið hevur sett HR-mennara, er Tórshavnar kommuna.

Sosialurin hevur tosað við Jó­hannu Andreasen úr Eik og Elin Wang úr Tórshavnar Kommunu um nýggja tilmæli um HR deild í Heilsuverkinum. Jóhanna og Elin eru báðar sjúkrarøktarfrøðingar og hava arbeiðsroyndir í heilsu­verki­num.

Tær leggja báðar dent á, at starvs­fólkamenning skal stuðla undir eina orðaða visión hjá fyri­tøk­uni.

- Fyrst mugu virðini og visiónin orðast, út frá hesum kann eitt yvir­lit gerast yvir, hvørji starvsfólk brúk er fyri. Og nústaðni tá kunnu vit leggja menningarætlanir, skeið­ir og annað til rættis, sigur Jó­­hanna Andreasen.

Elin Wang lýsir tað við eini mynd.

– Ikki at hava eina yvirskipaða ætlan er sum at skjóta eina rúgvu av pílum avstað og so aftaná fara og seta málskivuna upp. Á heilsu­øki­num er peningur settur av til skeið, men spurningurin er, um hann verður brúktur nóg effek­tivt.

Jóhanna heldur, at sjúkra­hús­verkið manglar skipað viðurskifti á hesum økinum.

- Tað er ongin yvirskipað ætlan. Fólk fara á hissini skeið her og der. Men ongin felags visión er, ongin orðað ætlan, ongin sum sting­ur út í kortið og sigur, hygg, hetta hava vit brúk fyri, og hetta kanst tú brúkast til.

Tað er tí sera jaligt, at ein HR deild er partur av nýggja sjúkrahús­álitinum, halda tær báðar.

Tá fólk støðast

Fólk eru ymisk, og tað er eisini ymiskt, hvat fær eitt starvsfólk at trívast. Men nakrir felags faktorar eru. Kanningar vísa, at starvsfólk, sum trívast, kenna, at tey hava ávirk­an á stovnin, tey fáa feedback og viðurkenning, og leiðslan er opin og álitisvekjandi.

- Bispebjerg Hospital hevur kann­­að, hvat starvsfólkini meta hev­­ur størst týdning fyri trivnaðin. Nið­urstøðan var: fakligar avbjóð­ingar, gott kollegialt umhvørvi, ný­­mótans leiðsla og persónlig ávirk­an. Lønin var, sigur Jóhanna Andreasen, so løgið tað ljóðar, ikki á listanum.

Fólk søkja ikki bara eftir peng­um í dag. Fólk søkja avbjóðingar, spenning og sjálvrealisering. Og tí eigur sjúkrahúsverkið ikki at vera bangið fyri at taka kappingina upp við til dømis privatar fyri­tøk­ur. Arbeiðsøkið er so vitanartungt, og menningin so stór á økinum, at heilsuverkið burdi verið tað mest attraktiva arbeiðsplássið í Føroy­um.

Má ikki drukna

Ein HR menning á heilsuøkjunum er alneyðug, heldur Jóhanna Andrea­­­sen. Men tað er týdningar­mikið, at hetta verður gjørt á rætt­an hátt.

- Sjúkrahúsverkið hevur verið gjøgnum nógvar sparirundir og um­leggingar. Og tá leiðslurnar ong­an­tíð vita, hvussu fíggjar­karm­urin sær út næsta ár, er tað kanska ikki so løgið, at tey ikki tora at hugsa stórar tankar innan starvs­fólkamenning. Men nýggja starvs­fólkadeildin má fáa rúm at ar­­beiða.

Eik hevur næstan 300 starvsfólk og tveir HR mennarar. Sjúkrahús­verkið hevur umleið 800 starvs­fólk, og sjúkrahúsálitið mælir til, at nýggja starvsfólkadeildin fær 2-3 fólk. Sambært HR-mennar­an­um hjá Eik hevur tað týdning, at minst tvey fólk setast til starvs­fólkamenning burturav.

- Um deildin skal taka sær av øllum starvsfólkaøkinum, má ans­ast ótrúliga væl eftir, at starvs­fólka­menningin ikki druknar í um­siting.

Mobil starvsfólk

Sjúkrahúsálitið viðurkennir, at starvsfólk í dag eru mobil, og at skipanin tí má tryggja, at vitanin hjá starvsfólkunum verður spjadd út. Eisini leggur álitið dent á, at ein týðandi partur av starvsfólka­menningini er at sleppa undan fys­iskari og psykiskari niðurslíting av starvsfólkum, so fólk ikki ríma.

Jóhanna Andreasen og Elin Wang eru sjálvar dømi um mobil starvsfólk. Heilsuverkið kappast ikki bara við útlendsk sjúkrahús um arbeiðsmegina, men eisini við privatu vinnuna. Og við ongum arbeiðsloysi í landinum, er kapp­ing­in um tey góðu fólkini hørð. Í Eik eru tildømis umleið sjey starvs­­fólk, sum upprunaliga ar­­beiddu á almanna- og heilsuøki­num.

Tað er ikki bara í Føroyum, at heilsuverkið hevur starvsfólka­trupul­leikar. Elin Wang nevnir sum dømi eitt danskt sjúkrahús, har hon arbeiddi.

– Tá eg hevði verið har í eitt ár, var eg millum tey, sum høvdu ver­ið har longst. Tað manglaðu 15 sjúkrarøktarfrøðingar, og skiftandi vikarar tóku sær av hesum upp­gávum. Eingin trivnaður var, og ringt var at varðveita serkunnleikan á deildini.

Menning og branding

HR menning umfatar millum ann­að skeiðvirksemi, undirvísng, coach­ing, at gera karrieruplanir fyri hvørt einstakt starvsfólk, at finna røttu starvsfólkini, at gera profilar av starvsfólkunum, at gera nøgdsemiskanningar o.s.fr.

Human Resource menning set­ur soleiðis starvfólkatrivnað í há­sæti. Og tá leiðslan setir fólk at taka sær av starvsfólkamenning burt­urav, sendir hon eitt týdn­ingar­mikið signal, sigur Jóhanna Andrea­sen. Starvsfólkini merkja, at leiðslan virðismetir tey, og ynsk­ir at menna og brúka tey á besta hátt. Hetta skapar innanhýsis trivnað og brandar eisini fyritøk­una ella stovnin jaliga úteftir.

Og skal føroyska heilsuverkið útvega og varðveita tey góðu fólk­ini í framtíðini, er tað, sambært før­oysku HR mennarunum, sum Sosialurin hevur tosað við, neyð­ugt at bøta um bæði trivnað og umdømi.

FAKTA

Tilmæli 16 í Sjúkrahúsálitinum

Felags starvsfólkafyrisiting fyri sjúkrahúsverkið verður sett á stovn, sum, umframt at umsita lønar- og sátt­mála­viðurskifti hjá starvsfólkunum, eisini skal arbeiða við at seta skipanir og mannagongdir í verk. Hetta fyri at útvega, gagnnýta, menna og varðveita røttu starvsfólkini í samsvari við tey mál, ið sett eru fyri sjúkrahúsið ella sjúkrahúsverkið í síni heild. Hesin parturin verður eisini nevndur ‘Human Ressource Management’