Leiðarin fyri Sea Shepherd, Paul Watson, hevur fleiri ferðir síðstu dagarnar víst á, at eina skipið hjá felagsskapinum, Sam Simon, í løtuni er í Hetlandi, har tað keypir proviant og olju til teir skjóttgangandi bátarnar. Orsøkin skal vera, at felagsskapurin ikki fær loyvi at keypa hesi ting í Føroyum.
In.fo hevur í dag tosað við tvær av teimum størstu heilsølunum í landinum, Poul Michelsen og Poul Hansen. Hvørgin av heilsølunum hava fingið ein fyrispurning frá felagsskapinum viðvíkjandi keyp av vørum.
- Eg kenni ikki til, at vit hava fingið nakran fyrispurning frá Sea Shepherd, sigur Høgni Hansen, stjóri hjá Poul Hansen.
Heldur ikki hjá Poul Michelsen, hava tey fingið nakra áheitan.
- Nei, vit hava ongan fyrispurning fingið. Tey kunnu tó fara inn í ein og hvør handil at keypa tað, ið teimum tørva. So nógv eru tey heldur ikki, sigur Poul Michelsen.
