Árni Joensen
Tíðarritið Journal of Clinical Oncology skrivar, at danskar rannsóknir vísa, at kvinnur, sum taka digoxin orsakað av hjartatrupulleikum og óregluligum hjartaslátti, eru í 40 prosent størri vanda fyri at fáa bróstkrabba enn kvinnur, sum ikki brúka heilivágin.
Kanningarnar umfataðu kvinnur, sum tóku digozin í árunum frá 1995 til 2008. Niðurstøðan er, at av 104.648 kvinnum høvdu 2.144 fingið bróstkrabba. Harafturat vísti tað seg, at hjá kvinnum, sum góvust at taka heilivágin, minkaði vandin fyri bróstkrabba.
Um orsøkina til at digoxin økir vandan fyri bróstkrabba siga teir donsku granskararnir, at heilivágurin virkar á líknandi hátt sum østrogen, og tað er gomul vitan, at tað hormonið økir vandan fyri krabbameini.
Granskararnir gera tó vart við, at ágóðin av at brúka digoxin fyri hjartatrupulleikar kann vera størri enn tann økti vandin fyri krabbameini.
Fyri tveimum árum síðani noyddist heilivágvirkið Actavis Totowa, ið ger hjartaheilivágin digitek, ið virkar eins og digoxin, at taka vøruna av marknaðinum, tí tað vísti seg, at summar tablettir vóru tvær ferðir størri, enn tær áttu at vera. Av tí sama var vandi fyri, at fólk fingu nógv meiri heilivág, enn tey áttu at fáa.
