Leygarkvøldið var hátíðarhald í Oyndafirði, har fimm sløkkiliðsmenn í Skálafjarðar Sløkkliliði vórðu heiðraðir fyri trúgva tænastu í sløkkiliðnum í meiri enn 25 ár.
Hátíðarhaldið var í sambandi við jóladøgurðan hjá sløkkiliðsmonnunum, sum í ár var í Oyndarfirði. Har helt formaðurin í Sløkkiliðnum, Jóhannus Danielsen, borgarstjóri á Nesi, talu fyri teimum fimm sløkkiliðsmonnunum, og handaði teimum heiðurstekin.
Teir fimm sløkkiliðsmenninir, sum fingu heiðurstekin, eru:
Sunleiv Højgaard í Runavík, átaksleiðari, sum hevur verið sløkkiliðsmaður í samfull 33 ár.
Jan Abrahamsen á Strondum, sum hevur verið sløkkiliðsmaður í 32 ár.
Hanus Heinesen, á Nesi, liðleiðari, sum hevur verið sløkkiliðsmaður í 29 ár.
Niclas Davidsen á Toftum, sum hevur verið sløkkiliðsmaður í 29 ár.
Harry Benjaminsen á Toftum, sum hevur verið sløkkiliðsmaður í 29 ár.
Johannus Danielsen sigur, at tað er Margretha drotning, sum stovnaðu heiðurmerki fyri sløkkiliðsmenn í 1973. Eftir tilmæli úr Føroyum, var tað stjórin í donsku tilbúgvingarnevndini, Beredskabsstyrelsen, sum góðkendi, at hesir fimm nú skuldi fáa heiðurstekn fyri trúgva tænastu í sløkkiliðnum í minst 25 ár, og hetta er fyrstu ferð, at hesi heiðurstekin eru latin í Føroyum.
Skálafjarðar Sløkkilið, SKS, er eitt felags sløkkilið fyri Sjóvar-, Runavíkar- og Nes kommunu og samstarvið hevur nú 44 ár á baki.
– Sløkkiliðið, hevur sera trúfasta manning og fyri stívliga trimum árum síðani fingu átta sløkkiliðsmenn “Dronningens fortejenstemedalje i sølv” fyri 40 ára trúgva tænastu, sigur borgarstjórin.
