Nýútnevndi kandidaturin til landsstýrissessin hjá Jacobi Vestergaard, Heðin Zachariasen, veit ikki enn, um løgmaður góðkennir hann sum landsstýrismann, tí enn hevur hann onki frætt úr Tinganesi Tríggjar tímar eftir útnevningina í Fólkaflokkinum hevur Heðin Zachariasen onki frætt frá løgmanni. Tí hevur ivi stungið seg upp, hvørt løgmaður FER at góðkenna nýggja landsstýrisevnið ella ikki.
Ein fundur millum Jørgen Niclasen og Jóannes Eidesgaard klokkan 14 varð avlýstur, og enn hevur løgmaður ikki sett seg í samband við Heðin Zachariasen, tíansheldur góðkent hann sum landsstýrisevni.
Jørgen Niclasen hevur torført við grundgeva, hví fundurin varð avlýstur, men sigur, at hann og løgmaður komu ásamt um, at tað ikki var neyðugt at halda fund.
Floksformaðurin hjá Fólkaflokkinum ivast tó ikki í, at løgmaður fer at rætta seg eftir tilmælingini hjá flokkinum.
Hjá fjølmiðlunum hevur als ikki verið møguligt at koma ígjøgnum til Jóannes Eidesgaard. Sjálvt ikki kunningarráðgevin hjá løgmanni veit, hvar hann er. Tað ljóðar, at Javnaðarflokkurin situr á fundi og viðger nýggju støðuna í Tinganesi.
