Fríggjakvøldið dystaðust Víkingur og HB um rættin at halda fram í kappingini um løgmanssteypið. Tann rættin fóru havnarmenn úr Sarpugerði við. Eftir vanliga leiktíð var 1-1, og fram ímóti endanum í longdu leiktíðini skoraði HB 2-1 sigursmálið.
Klokkan 18 í kvøld bresta HB og Víkingur saman aftur. Nú verður tað í landskappingini, og í kvøld eigur HB heimavøll.
HB er næstovast á støðutalvuni – 13 stig og tvey stig aftanfyri KÍ – og tað vil siga, at um tað í kvøld eydnast HB at vinna fulla úrtøku, so verður HB nýtt topplið. Soleiðis verður tað í hvussu so er inntil í annaðkvøld, tá ið KÍ fer at spæla á Toftum.
Í steypadystinum fríggjakvøldið var Mikkel Dahl á vøllinum, inntil tað varð farið undir longdu leiktíðina. Tað sást væl, at hann var ikki heilt væl fyri. Mads Borchers var í álopinum alla tíðina, meðan einki sást til Jákup L. Thomsen, sum higartil í ár ofta er skiftur inn, men sum ikki var á listanum fríggjakvøldið. Bartal Wardum fór eitt korter undan leikloki í vanligu leiktíðini av vølli. Í hansara stað varð Samuel Chukwudi settur. Hann hevur higartil í ár verið skaðadarvaður. Møguleiki er fyri, at Samuel fer at eiga størri leiklut í kvøld, enn hann átti fríggjakvøldið.
Hjá Víkingi kemur tað illa við, at Atli Gregersen eisini í kvøld er leikbannaður. Fríggjakvøldið megnaðu Arnbjørn Svensson og Bergur Gregersen væl leiklutirnar í miðverjuni. Alt bendir á, at teir eisini í kvøld fara at vera miðverjar. Finnur Justinussen og Ari Olsen hava verið so mikið illa darvaðir av skaðum, at teir fríggjakvøldið ikki vóru á listanum.
HB – Víkingur: Jóhan Hendrik Ellefsen kl. 18.00
| KÍ | 5 | 5 | 0 | 0 | 15 | 2 | 15 |
| HB | 5 | 4 | 1 | 0 | 14 | 2 | 13 |
| B36 | 5 | 4 | 0 | 1 | 10 | 4 | 12 |
| Víkingur | 5 | 2 | 1 | 2 | 11 | 8 | 7 |
| EB/Streymur | 5 | 2 | 1 | 2 | 4 | 5 | 7 |
| ÍF | 5 | 2 | 0 | 3 | 6 | 6 | 6 |
| 07 Vestur | 5 | 1 | 1 | 3 | 6 | 9 | 4 |
| TB | 5 | 1 | 1 | 3 | 4 | 17 | 4 |
| B68 | 5 | 0 | 3 | 2 | 5 | 10 | 3 |
| AB | 5 | 0 | 0 | 5 | 0 | 12 | 0 |
