Fótbóltur
VB/Sumba fer næsta kappingarár at spæla í næstbestu deildini. Tað er ikki støddfrøðiliga staðfest, men eingin, sum var í Gundadali sunnudagin, har høgættin var væl mildari, enn hon var aðra staðni kring landið, ivaðist í, at suðuroyingarnir ikki fara at spæla í fremstu røð næsta ár.
VB/Sumba spælararnir tóktust heldur ikki sjálvir at ivast í, hvør veruleikin er. Liðið hevði lítið at bjóða uppá, tá ið teir fyri aðru ferð í eina viku løgdu rygg til seks mál ímóti sær á útivølli.
Niðurflytingin er altso veruleiki. Hvussu tað verður hjá HB er ein heilt annar spurningur. Hesa ferð vunnu teir 6-2, og sigurin kundi havt verið nógv størri.
Tá ið tíggju minuttir vóru farnir, var heimaliðið frammanfyri 2-0. Fyrra málið skoraði Rókur Jespersen, sum taldist millum teirra, ið stóðu sterkir í myndini. Hans á Lag stútaði eftir horna ímóti málinum. Vlada Filipovic hálvbjargaði, og Rókur var fyrstur á returbóltinum.
Fyrrverandi VB spælarin, Milan Kuljic skoraði til 2-0, eftir at Andrew av Fløtum úti í borðinum hevði tikið bóltin av vágbingum og lagt innfyri.
So var ballið buðið, og Rógvi Jacobsen, sum kanska var troyttur eftir landsliðsferðina, fór av vøllinum.
Tað var púra greitt, at VB/Sumba fór ikki at hótta HB, og spælararnir á heimaliðnum vóru ivaleyst eins áhugaðir í, hvussu tað gekst í Streymnesi og í Gøtu, sum teir vóru í at seta seg upp til stórsigur ímóti einum liði, sum longu hevði tapt.
Undir øllum umstøðum dalaði leikferðin nógv. Jákup á Borg spældi Milan Kuljic leysan til 3-0,og Dan Djurhuus stútaði til 3-1, tá ið HB eftiransingarnar í sambandi við horna vóru verri, enn tað sømir seg liði, sum hongur í og enn onga orsøk hevur til at sleppa FM dreyminum.
Seinna umfarið er ikki so nógv at skriva um. Tað var endurtøka av 1. hálvleiki. Andrew av Fløtum átti uppspælið til málið, sum Rókur skoraði, og Milan Kuljic umsetti brotsspark til mál. Marko Moravic pyntaði um fyri VB/Sumba.
Teir á meistaraliðnum hugsa nú saman við trúgvu áskoðarunum um stóru uppgávurnar, sum standa fyri framman. Sunnudagin var talan um avgreiðslusigur.
