TB - HB 1-5 (0-3)
– Vit hava besta fólkið og besta liðið. Tað er upp til okkum sjálvar at gera av, um vit vinna dystirnar. Tað gera vit, um vit fara í arbeiðsklæðini.
Soleiðis segði HB venjarin, Odddbjørn Joensen, tíðliga í ár. Tá kendist hetta kanska at vera mest sum ov nógv sjálvsálit. Oddbjørn Joensen segði hetta eftir fyrsta umfar, tá ið grannauppgerðin ímóti B36 endaði 1-1, og gongdin síðani hevur víst, at venjarin hevði grein í sínum máli.
Sjáldan er tað komið fyri, at eitt lið hevur ligið so væl á kósini fram ímóti meistaraheitinum, sum HB er tað í ár. Hetta varð aftur staðfest í gjár, tá ið HB við trivaligum 5-1 sigri við Stórá í Trongisvági økti um stigamunin aftur til einasta kappingarneytan, ÍF, sum nú er tíggju stig aftanfyri HB.
Ein triðingur – níggju umfør – resta av ársins landskapping. Trý tey síðstu umførini eru í oktober. Soleiðis sum gongdin hevur verið nógvu tær seinastu ferðirnar og serliga, sum hon var hesa ferð, so er tað rættuliga sannlíkt, at HB fer at hava tryggjað sær FM heitið, áðrenn september mánaði verður liðugur. Kanska verður tað á mikkjalsmessu, 29. september, tá ið 07Vestur verður gestur hjá HB í Gundadali, og kanska verður tað fyrri enn so!
– Teir vóru ágangandi fyrsta korterið, tá ið teir pressaðu okkum frammarlaga á vøllinum. Hetta hevði við sær, at tað var tungt hjá okkum at fáa orduligt fótbóltsspæl í lag, men vit fótaðu okkum so við og við, og tað hjálpti væl, tá ið vit tíðliga løgdu okkum framum. Tá ið vit lítlu løtuna undan steðginum tvær ferðir øktu um leiðsluna, kendist tað soleiðis, at tað skuldi ganga heilt illa í 2. hálvleiki, um vit skuldu missa leiðsluna, staðfestir HB venjarin, Oddbjørn Joensen, sum rósar sínum monnum fyri gott avrik:
– Vit eru so vanir við hetta slagið av dystum. Á ólavsøku royndi NSÍ hetta ímóti okkum í Gundadali, so vit hava royndirnar í hesum slagi av fótbólti. Tá ið vit skoraðu, lætti tað, og eg haldi, at spælararnir sýndu sera góðan hugburð, og teir arbeiddu væl saman sum eitt lið.
Fullsett lið
HB er tíggju stig frammanfyri ÍF, sum er næstfremst, og HB hevur ógvuliga góða manning. Á ólavsøku var Símun Samuelsen trífaldur málskjútti. Hesa ferð var hann leikbannaður, men tað sást ikki aftur á tann hátt, at tað bilaði við málskjótingini.
Kristin R. Mouritsen setti hol á, tá ið eitt korter var farið. Lítla løtu undan steðginum varð alt avgjørt, tá ið fyrst Christian R. Mouritsen økti til 2-0, og tá ið síðani væl upplagdi miðvallarin Heini Vatnsdal eftir gott einmansavrik økti um munin til 3-0.
At HB bonkurin er breiður sást eitt nú aftur í, at hesa ferð var Pál Mohr Joensen í miðverjuni, meðan Gunnar Haraldsen sat uttanfyri. Og har sótu eisini málverjin Hans Jørgensen, sum fyri stuttum fekk landsliðsboð, Páll Mohr Joensen, Bárður Johnson Heinesen og Tróndur Jensen. Ivaleyst høvdu teir allir verið sjálvskrivaðir á besta liðnum í flestu feløgum.
Tungt hjá TB
Fyri fimtu ferð á rað noyddist TB av vøllinum uttan at hava vunnið stig. Liðið er undir strikuni, og tað kennist sjálvandi tungt, og tað verður ikki minni tungt, nú tryggi aftasti skansin Ivan Stojkovic verður leikbannaður sunnudagin í Streymnesi, tí hann eftir ein tíma varð vístur av vøllinum, eftir at hann uttanvert brotsteigin óregluliga hevði steðgað mótstøðumanni.
Hugburðurin var annars góður, og liðið vísti vilja at stríðast. At munurin gjørdist so stórur sum 5-1 komst av, at í staðin fyri at binda um og bara at verja, so spenti TB eisini í 2. hálvleiki álopsbogan.
Bill Jacobsen setti sín dám á við at hava kantspælararnar Dan Mortensen og Ragnar Tausen millum teir fyrstu ellivu. Teir arbeiddi nógv, men teir vóru ikki á vøllinum alla tíðina.
Ragnar Tausen noyddist av vøllinum, tá ið nýggjur málverji varð settur inn í staðin fyri Ivan Stojkovic. Tað var Askel Berg, sum í síðsti viku fylti 17 ár. Í fýra dystum hevur hann vart TB málið í 1. deild. Hetta var fyrsta ferðin yvirhøvur, at hann var á besta liðnum. HB liðformaðurin, Fróði Benjaminsen, sta HB liðformaðurin, Fróði Benjaminsen, festi sigurin við tveimum málum. Harvið er hann saman við Símuni Samuelsen HB toppskjútti við níggju málum.
Poul Ingason minkaði um munin til 3-1 við góðum stútara eftir innlegg frá Dan Mortensen. Tá var 2. hálvleikur tíggju minuttir gamal, og TB kendist fáa mót av nýggjum. Men HB var eirindarleyst.
Toppliðið fór norður við øllum stigunum, og ivaleyst tilvitað um, at boksspælarin, sum skal til fyri at gera liðið uppaftur meiri komplett, er at finna á Tvøroyri. Poul Ingason verður sannlíkt tann næsti suðuroyingurin, sum verður fiskaður til Havnar. Fyrireikað verður til europeisku meistarakappingina næsta ár. Oddbjørn Joensen kann seta sjálvstýraran til at orna FM 2013!
