Eftir jánkasliga várið hevur HB av álvara fingið luft undir veingirnar. HB hevur vunnið fulla úrtøøku fimm tær seinasatu ferðirnar – síðsti sigurin var mikukvøldið ímóti higartil ósigraða KÍ – og nú kappast HB fyri at vinna silvur í landskappingini og aftur í ár at vinna steypakappingina.
Um tað skal eydnast at vinna næstfremsta plássið, so er neyðugt at vinna á Dungasandi í Sørvági seinnapartin. 07 Vestur hevur tvær ferðir fyrr í ár spælt á útivølli ímóti HB. Fyrru ferðina vann HB 7-0, og seinni dysturin endaði við 5-0 heimasigri.
Tað er ikki so ofta komið fyri, at tað fleiri umfør undan kappingarenda hevur verið greitt, at 07 Vestur fer at halda fram í bestu deildini. Soleiðis er tað nú, og tað er eisini greitt, at dugnaligi svenski venjarin Magnus Powell fer at halda fram sum venjari í Vágum. Málið í Vágum er at menna liðið, so dagsskráin, heldur enn at stríðast fyri at flyta upp og at sleppa undan at flyta niður, skal snúgva seg um at kappast ovarligari á støðutalvuni. Tí hevur tað stóran týdning at runda hetta kappingarárið væl av.
Hjá 07 Vestur er álopsspælarin John Fagerström tøkur aftur, eftir at hann var leikbannaður í 2-0 tapinum í Runavík síðsta sunnudag.
Í HB er stór kapping um plássini. Heri H. Mohr varð mikukvøldið skiftur inn í seinna hálvleiki. Tað er sannlíkt, at hann í dag frá dystarbyrjan verður á vongverjanum í høgru.
