Í kvøld kl. 20.00 hevur Havnarkórið konsert í Fríðrikskirkjuni á Toftum. Skráin er fjølbroytt við solosangi, duett, kvinnukóri og blandaðum kóri. Av sangum kunnu nevnast »Pie Jesu« eftir Andrew Lloyd Webber, har Eivør Pállsdóttir syngur solo og duett saman við Jóhonnu Fonsdal og Jóhonnu Thomassen, Petra Iversen syngur »O Jesulein süss« eftir J.S. Bach og »Dank sei Dir, Herr« eftir Händel og Berghild Poulsen syngur jólasangin hjá Adolpe Adams, sum á svenskum eitur »O, helga Nacht«, og ariuna »How beautiful are the feet« úr Händels Messias. Klaverfylgispælið hevur Jóhannes Andreasen.
Kórini syngja kendar advents- og jólasálmar, og á skránni hjá blandaða kórinum eru sum høvuðsverk 5-raddaða motettin hjá J.P. Sweelinck »Hodie Christus natus est« (Í dag er Kristus føddur) og motettini fyri dupultkór »Der Geist hilft unser Schwachheit auf« eftir J.S. Bach.
