Tað verður ein rúgva av nostalgi, tá sending nummar 100 í donsku útgávuni av X-factor fer av barkastokki í kvøld.
Fleiri fyrrverndi luttakarar fara á pall, og millum hesi er føroyski Sveinur Gaard Olsen, sum fyri trimum árum síðani kom í finaluna.
Hesa ferð verður framførslan uttan trýstið, sum fylgir við, tá kappingin er á skránni, men Sveinur sigur, at hetta ger honum tað sama.
- Eg havi ongantíð havt nervar, tá eg skal á pallin, so hjá mær er eingin broyting í so máta. Hetta verður bara ein hugnalig uppliving, og tað skal nokk blíva stuttligt, heldur Sveinur.
Tað var við nógvum rocki og eitt sindur av roll, at Sveinur vann seg fram í finaluna í 2012, men tað verður ikki tann síðan av Sveini, sum vit koma at síggja í kvøld.
- Eg fái ikki avdúkað, hvønn sang eg fari at syngja, men tað verður ikki ordiliga rock'n roll. Tá vit eru somikið nógv, sum skulu á pall, so noyðist mann at ganga við til kompromis. Men tað verður eitt sindur av popputum rocki, sigur Sveinur, nú tey fyrireika seg til at fara á pall.
