Fyri eini løtu síðani eydnast froskmonnum at finna beinagrindini á botni út fyri Ljósá, sum leitað hevur verið eftir í gjár og í dag. Tað var í gjár, at ein frítíðarkavari svam seg fram á eina beinagrind á 20 metra dýpi, einar 100 metrar úr landi. Hann tók skøltin við á land og boðaði so løgregluni frá.
Les eisini: Kavari funnið eina beinagrind við Ljósá
Farið varð at leita, men leitingin í gjár mátti halda uppat, tí líkindini vóru ikki til at halda fram. Í morgun var leitingin tikin upp aftur og nú er beinagrindin funnið.
Fólk á staðnum siga, at nú eru løgregla og froskmenn farnir á staðið at taka myndir av beinagrindini og so skal støða takast til, hvussu hon kann fáast upp so heil sum gjørligt.
Les eisini: Góðar vónir um at finna beinagrindina aftur
Tað er óvist um beinangrindin verður tikin upp í kvøld ella í morgin, tí løgreglan sigur, at nú teir hava funnið hana, er eingin beinleiðis skundur at bjarga henni í land, tí tað er eisini neyðugt at fara fram við varsemi, fyri ikki at oyðileggja møgulig spor.
Tá ið beinagrindin er bjargað, verðru farið undir arbeiðið at eyðmerkja hana. Í hesum sambandi verður kannað eftir, hvørji fólk eru saknað og so verður arbeitt út frá tí, segði løgreglan við in.fo fyrr í dag.
|
