Tey í Tórshavnar kommunu sum pakkaðu posan frá Posta upp í gjárkvøldið varnaðust, at har var eitt blað, nevnt »Kommunuval 2016«. Blaðið er úr enda í annan ein útspillingarherferð ímóti Heðini Mortensen, borgarstjóra í Havn.
Ikki tí, slíkt runublakarí er ikki ókent í politikki. Tað løgna er tó við hesum blaðnum, at eingin avsendari er á, og ongastaðni verður nevnt, hvønn avsendarin umboðar. Í hesum døgum verða vit annars spammað við myndum av fólkum, ið trola eftir atkvøðum. Hesin hevur onga mynd av sær, men niðast á hvørji síðu stendur:
»Vit sum vilja broyting • nýggja byrjan • fíggjarligt skil«.
Hesi eru slagorð, sum vit kenna aftur úr onkrum av politisku skráunum, sum eru lagdar fram í sambandi við býráðsvalið.
Tað verður skotið við skørpum í blaðnum, og mutur verður bikslað leiðsluni í Tórshavnar býráð, tá skrivað verður, at ávísar vinnufyritøkur verða favoriseraðar, og at politikarar eru tvinnaðir upp í hesa favorisering.
Eisini verður sagt, at tað er trupult hjá ávísum fyritøkum at fáa lut í kommunalum arbeiði.
Avsendarin sigur ikki beinleiðis, hvønn vit skulu velja í Tórshavnar býráð. Men í eina krossskipan hevur hann bólkað 9 fólk.
Tey, ið umboða manglandi sosiala raðfesting og fíggjarligt óskil eru:
· Heðin Mortensen
· Helena Dam á Neystabø
Tey, ið umboða fíggjarligt skil og sosiala raðfesting eru:
· Annika Olsen
· Kaj Leo Holm Johannesen
· Jan Christiansen
· Beate L. Samuelsen
· Ruth Vang
· Leivur Hansen
· Boði Haraldson
Tá tey koma til arbeiðis á Posta í morgun fara vit at spyrja tey, hvør avsendarin er, og um tað veruliga stendur øllum frítt at senda dulnevnt útspillingartilfar við almenna postfelagnum.
