Fert tú á ólavsøku?
- Ja, sjálvandi fari eg á ólavsøku. Eg havi hildið allar ólavsøkur, eg veit um - undantikið tey árini, eg var í útlondum í útbúgvingarørindum.
Hvussu heldur tú ólavsøku í ár?
- Saman við konuni vóru vit til setanina á Vaglinum, og síðan hugdu vit eftir onkrum framsýningum.
Tað sigur Marius Thomas Rein, kirkjuráðsformaður.
Hann vísir á, at tað eru nøkur ár síðan, at hann og konan hava verið til kappróður, men í gjár vóru tey til konsetina í Havnar kirkju, har Ernst Sondum og vinfólk sungu og spældu.
Eftir konsetina skuldi kirkjan gerast klár til hátíðargudstænastuna ólavsøkumorgun.
Hvat er tað besta við ólavsøkuni?
- Tað besta við ólavsøkuni nú er gudstænastan ólavsøkumorgun, sum er sera hátíðarlig.
Hvat kundi verið øðrvísi við ólavsøkuni?
- Eg haldi, at alt, sum børnini skulu til á ólavsøku, skuldi kostað nógv minni, enn tað ger. Tað eru alt ov mong, sum gera sær dælt við at vinna sær pening burtur úr ólavsøkuni, sigur Marius Thomas Rein.
